Nafta Brent ngjitet në mbi 83 USD – Investitorët presin takimin e OPEC+ dhe COP28

Nafta po qëndron në rritje edhe në sesionin e sotëm, ndërsa e gjithë vëmendja e investitorëve është e përqendruar te përfundimi i takimit të OPEC+, që mund të vendosë të tjera shkurtime të prodhimit, gjatë vitit 2024. Kontratat “futures” për janarin të naftës Brent të Londrës po tregtohen në mbi 83 dollarë për fuçi, ndërsa volumi është i ulët sepse kjo kontratë skadon ditën e sotme.

Nafta Bruto amerikane po tregtohet në mbi 78 dollarë për fuçi. Grupi OPEC+, që përfshin Organizatën e Vendeve Eksportuese të Naftës dhe aleatët e tjerë, me në krye Rusinë, zhvillon sot takimin “online” për të diskutuar shkurtimet shtesë të prodhimit që mund të variojnë nga 1 milion deri në 2 milion fuçi në ditë, në fillim të vitit 2024.

Takimi zhvillohet ndërkohë që liderët globalë janë mbledhur në Dubai për konferencën e OKB-së mbi klimën, COP28, ku priten gjithashtu përplasje me vendet prodhuese të naftës. Analistët shprehen se, nëse OPEC+ vendos të zbatojë marrëveshjen për uljen e prodhimin edhe në vitin 2024 do të ndikojë në rritjen e çmimeve në terma afatshkurtër, por në afatgjatë, ndikimi do të jetë i dyshimtë, për shkak të ngadalësimit të kërkesës në SHBA dhe Kinë, dy konsumatorët më të mëdhenj të naftës në botë.

Ndër zhvillimet e tjera, Administrata për Informimin mbi Energjinë raportoi një rritje surprizë me 1.6 milionë fuçi të rezervave të naftës bruto në SHBA, gjatë javës së kaluar, kundrejt parashikimeve të analistëve për një rënie me 933,000 fuçi. Pesimizmit në kahun e kërkesës i shtohen problemet e vazhdueshme ekonomike të Kinës, pasi të dhënat e publikuara të enjten treguan një tkurrje të aktivitetit të fabrikave për të dytin muaj me radhë, gjatë nëntorit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.