Euro, në nivelin më të lartë në 1 vit – Mbështetet nga rimëkëmbja graduale e ekonomisë europiane
Euro po qëndron në nivelin më të lartë në 1 vit edhe në sesionin e sotëm, përballë dollarit amerikan, pasi ekonomia e Europës po shfaq shenja të rimëkëmbjes, ndërsa në Shtetet e Bashkuara është rikthyer shqetësimi për sektorin bankar.
Monedha europiane është ngjitur deri në 1.105 dollarë në sesionin e sotëm, niveli më i lartë që nga prilli i vitit të kaluar. Në anën tjetër, indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 101.4, ndërsa në sesionin e kaluar ra me 0.4%. Gjermania rishikoi sërish në rritje parashikimin për zgjerimin e ekonomisë, ndërsa një tjetër vëzhgim sugjeron se besimi konsumator vijon përmirësimin.
Në kontrast me Europën, shpenzimet kapitale në SHBA ranë më shumë se parashikimet e analistëve, ndërsa rënia e depozitave të First Republic Bank me rreth 104 miliardë dollarë ka rikthyer shqetësimet për shëndetin e sistemit bankar në SHBA. Tashmë, analistët vlerësojnë se ka 80% mundësi që Rezerva Federale të rrisë normën e interesit me 25 pikë bazë, në takimin e 3 majit. Në tregun e kriptomonedhave, bitcoin po tregtohet në rreth 28,800 dollarë, ndërsa ethereum po tregtohet në rreth 1880 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.