Fabrika e dytë europiane e Tesla, në Spanjë? – Vlera totale e imvestimit llogaritet në 4.5 miliardë euro

Kompania Tesla është në bisedime me autoritetet rajonale të Valencias në Spanjë. Një zëdhënës i qeverisë rajonale deklaroi se kishte zhvilluar takime me një sipërmarrje jo të identifikuar, për sa i përket një investimi të madh në sektorin automobilistik, por refuzoi të jepte më shumë detaje.

Një burim tjetër konfirmoi se kompania në fjalë është Tesla. Investimi synon ndërtimin e një fabrike për prodhimin e automjeteve dhe mund të arrijë vlerën 4.5 miliardë euro, njësoj me projektin e parashikuar për fabrikën që pritet të ndërtohet në Meksikë.

Gjithçka ndryshe nga ajo që la të kuptohet Drejtori Ekzekutiv, Elon Musk, pas takimit tre javë më parë me presidentin francez, Emmanuel Macron.

Qeveria rajonale e Valencias mohoi ekzistencën e një marrëveshjeje me Tesla dhe ndërtuesi teksan nuk iu përgjigj kërkesave të mediave për koment. Në Wall Street, thashethemet ndihmuan në lëvizjen e aksioneve në nivele të larta për vitin, +113%.

Aktualisht, e vetmja fabrikë europiane e Tesla ndodhet në Gjermani, afër Berlinit. Me kapacitetin për të prodhuar 5 mijë automjete në javë dhe që mund të rritet nga gjysmë milioni në një milion në vit.

Sa i përket Spanjës, me mbi 2.2 milionë automjete të prodhuara, ajo është prodhuesi i dytë i makinave në Europë, pas Gjermanisë dhe përpara Francës dhe po përdor fondet europiane për të tërhequr investime në sektorin e baterive dhe automjeteve elektrike. Duke u përqendruar pikërisht tek bateritë, grupi Volkswagen filloi punën më 17 mars në Sagunto, gjithashtu pranë Valencias, në një gigafabrikë 40 GWh, e dyta në Europë. E para është në Salzgitter, Gjermani, me prodhimin që ka filluar në vitin 2025. Ajo do të punësojë 3 mijë persona. Investimi total i planifikuar është 10 miliardë dollarë dhe prodhimi do të nisë në vitin 2026.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.