Familjet në të gjithë Europën ‘në luftë’ për të paguar faturat dhe përballuar krizën e kostos së jetesës!

Filloi me energjinë, por kriza e kostos së jetesës tani është përhapur në të gjithë sektorët dhe po prek të gjithë Europën dhe më gjerë. Problemi ka shumë komponentë, por ai që shqetëson më shumë liderët politikë dhe që prek më shumë familjet është inflacioni i çmimeve të ushqimeve.

Në muajin shkurt, çmimet e gazit në Europë ranë në nivelin më të ulët në pothuajse 18 muaj, megjithatë, çmimet e ushqimeve po vazhdojnë trendin e tyre rritës.

Në janar, çmimet e ushqimeve në të gjithë Bashkimin Europian u rritën mesatarisht me 18.4% krahasuar me një vit më parë.

Hungaria doli si ‘kampione’ e rritjes së çmimeve të ushqimeve (48.2%), e ndjekur nga Lituania (32%) dhe më pas Sllovakia (28.6%). Rritjet më të ulëta të çmimeve u shënuan në Zvicër (5,8%) dhe Qipro (10,3%).

Ndikimi i krizës së kostos së jetesës është kërcënimi më serioz për komunitetin global sipas Raportit të Riskut 2023 të Forumit Ekonomik Botëror.

Kur çmimet e ushqimeve rriten, ato rrisin pasigurinë ushqimore dhe rrisin tensionet sociale. Ata gjithashtu shtrëngojnë buxhetet e qeverive që po luftojnë me rritjen e faturave të importit të ushqimit dhe zvogëlimin e kapacitetit për të financuar mbrojtje shtesë sociale për më të cenuarit.

Sigurisht, lufta në Ukrainë gjithashtu ka kontribuar në këtë problem. Pushtimi i Rusisë bëri që çmimi i drithit dhe produkteve të tjera kryesore të rritet në nivele rekord.

Rritjet e normave të interesit kanë lehtësuar presionet e çmimeve, por vëzhguesit thonë se moti, lufta dhe kostot materiale mund të mbajnë çmimet e ushqimeve të larta për më gjatë.

Kriza ka çuar në protesta në rrugë në shumë vende europiane dhe greva në të tjera, si në Mbretërinë e Bashkuar, ku punëtorët e sektorit publik janë në mosmarrëveshje me qeverinë për pagat dhe kushtet e punës.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.