Fondi për digat e rrezikuara – Buxheti 2024 do të mbështesë 9 projekte. Duhet të aplikojnë bashkitë

Bashkitë do kenë mundësi të përfitojnë nga “Fondi për Digat” gjatë vitit që vjen për të rehabilituar digat e rezervuarëve, ndërkohë që sipas buxhetit të parashikuar në total do të mbështeten 9 projekte.

“Fondi për Digat” është një mekanizëm financiar, që mbështet politikën kombëtare të parandalimit dhe menaxhimit të fatkeqësive natyrore, teksa për vitin 2024 ai është pjesë e programit për “emergjencat civile”.

Projektbuxheti nuk e ka të detajuar shumën konkrete që do të shkojë vetëm për rikonstruksionin e digave, teksa në total investimet për emergjencat civile janë parashikuar në 3.9 mld lekë, 2 mld prej të cilave janë financim i huaj dhe 1.9 mld lekë financim i brendshëm.

Ndërkaq, teksa projektbuxheti pritet të diskutohet në komisionet parlamentare, referuar proceduarve muaji nëntor 2023 shënon hapjen e thirrjeve për të përfituar nga fondi, ndërsa afati i fundit është data 28 shkurt 2024.

Praktikisht, bashkitë do të duhet të paraqesin projektet e tyre për digat që kanë në administrim, ndërkohë që vlerësimi i projekteve që përfshin, studimin dhe projektin e zbatimit sipas njësive të vetëqeverisjes vendore aplikuese bëhet me vendim të Komisionit për Parandalimin dhe Menaxhimin e Fatkeqësive Natyrore.

Sipas të dhënave nga Komiteti Kombëtar i Digave, në total numërohen 351 diga të mëdha, ndërkohë që numri i shfrytëzuesve të tyre është 67, duke qenë se një pjesë e tyre administrohen nga kompani private.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.