Gara për furnizimin me lëndë të para për bateri – Prodhuesit europianë të automjeteve me kontrata që nuk plotësojnë kërkesat

Europa ka mbetur prapa SHBA-së dhe Kinës për sa i përket aftësisë së saj për të siguruar lëndët e para të nevojshme për bateritë e automjeteve elektrike. Sipas një studimi përkatës nga grupi i punës për ‘Transport dhe Mjedis’, prodhuesit europianë të automjeteve kanë siguruar kontrata furnizimi që mbulojnë vetëm 16% të lëndëve të para – litium, kobalt dhe nikel – të nevojshme për të përmbushur objektivat e tyre për shitjen e makinave elektrike deri në vitin 2030. Ata kanë siguruar gjithashtu më pak se një të gjashtën e lëndëve të para kryesore të nevojshme deri në vitin 2030 për të prodhuar bateritë e automjeteve elektrike.

Dy prodhuesit më të mëdhenj të automjeteve elektrike në botë, amerikani Tesla dhe kinezi BYD, janë qartësisht përpara konkurrentëve të tyre europianë për sa i përket aksesit të tyre në lëndët e para për shtytje elektrike. Aktualisht është duke u zhvilluar një fushatë globale, një konkurs për të identifikuar metalet e nevojshme për prodhimin e baterive të automjeteve elektrike. Kryesisht fokusi është te litiumi, i cili është më i lehtë nga metalet e nevojshme, por nevojiten edhe kobalti dhe nikeli.

Sipas studimit përkatës të ‘Transport dhe Mjedis’ bazuar në të dhënat e shpallura nga prodhuesit europianë të automjeteve, ata kanë siguruar aktualisht vetëm 14% të litiumit të nevojshëm, 17% të nikelit dhe 10% të kobaltit që do të nevojitet deri në vitin 2030. Dhe afatet po bëjnë presion, pasi të dyja BE-ja dhe Britania synojnë të ndalojnë shitjen e automjeteve me lëndë djegëse fosile deri në vitin 2035.

Ndër prodhuesit europianë të automjeteve me veprimtari të mëdha brenda Europës që janë dukshëm prapa konkurrentëve të tyre janë Mercedes-Benz, BMW dhe Hyundai Kia. Në vend të kësaj, Ford, Volkswagen dhe Stellantis kanë bërë publike planet e tyre për akses në metalet e baterive, të cilat janë të ngjashme me ato të Tesla dhe BYD. Disa prodhues automjetesh mund të kenë marrëveshje sekrete me kompanitë e minierave ose të përpunimit të metaleve për të siguruar furnizimet e nevojshme, ndërsa të tjerë po eksplorojnë mundësinë e prodhimit të baterive me reduktim ose edhe pa përdorim të metaleve të shtrenjta si kobalti dhe nikeli.

E gjithë kjo vjen pasi firma e të dhënave ‘Benchmark Mineral Intelligence’ vlerëson se brenda dekadës së ardhshme, kërkesa për metale kritike për elektrifikim do të tejkalojë qartë ofertën. Ajo parashikon në mënyrë specifike që kërkesa për litium do të katërfishohet deri në vitin 2030, pasi Kina, Europa dhe deri atëherë SHBA do të jenë larguar nga benzina dhe nafta. Në këtë rast do të ketë një mungesë globale prej 390.000 tonësh litium në vitin 2030, kur prodhimi global do të arrijë në 2.7 milion ton. Në të njëjtën kohë, do të ketë mungesa të kobaltit dhe nikelit, të cilat në mënyrë të pashmangshme do të ngadalësojnë kalimin nga lëndët djegëse fosile në energjinë e gjelbër.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.