Georgieva, drejt një mandati të dytë në krye të FMN – Mbështetja ka ardhur nga ministrat e financave të BE

Ministrat e Financave të Bashkimit Evropian ranë dakord që Kristalina Georgieva, të drejtojë Fondin Monetar Ndërkombëtar për një mandat të dytë. Mandati aktual pesëvjeçar i Georgieva përfundon më 30 shtator. Tradicionalisht, vendet evropiane rekomandojnë drejtorin menaxhues të FMN-së dhe Shtetet e Bashkuara rekomandojnë kreun e Bankës Botërore.

“Ministrat e BE ranë dakord të mbështesin së bashku Kristalina Georgieva për një mandat të dytë si drejtoreshë menaxhuese e FMN,” tha një zëdhënës i presidencës belge të BE, ndërsa nuk kishte kandidatë të tjerë.

Bordi ekzekutiv i FMN këtë javë pritet të nisë zyrtarisht një periudhë nominimi gjatë së cilës vendet mund të paraqesin kandidatë për t’u konsideruar si pjesë e procesit të tij të mirëpërcaktuar, duke hapur rrugën për zgjedhjen e një drejtori menaxhues .

Në këtë fazë, nuk ka dalë asnjë kandidat joevropian, tha burimi. Procesi mund të nisë që të mërkurën me nominimet e hapura për rreth tre javë, duke u mbyllur në fillim të prillit, shumë përpara takimeve pranverore të FMN-së dhe Bankës Botërore në mes të muajit.

Georgieva, një shtetase bullgare, është gruaja e dytë që kryeson FMN-në dhe personi i parë nga një ekonomi tregu në zhvillim. Ajo është drejtoresha e 12-të e FMN-së që nga themelimi i tij në 1944. Georgieva deklaroi javën e kaluar se do të ishte “e nderuar” të shërbente për një mandat të dytë dhe u sigurua se kishte mbështetje të fortë për të midis vendeve evropiane dhe më gjerë.

E vetë-përshkruar “optimiste e përjetshme”, Georgieva e ka udhëhequr Fondin përmes goditjeve të mëdha në ekonominë globale, që nga shpërthimi i pandemisë COVID-19 vetëm disa muaj pasi ajo mori detyrën deri në pushtimin rus të Ukrainës në shkurt 2022.

Georgieva ka qenë e rëndësishme në sigurimin e kredive të mëdha për Ukrainën, ka mbikëqyrur një rinovim të programit masiv të kredisë së Argjentinës dhe ka punuar në mënyrë të qëndrueshme për të ndihmuar Kinën të përqafojë ristrukturimet e borxhit sovran.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.