Gjykata Kushtetuese rrëzon ankimimin e opozitës: Projekti për Portin e Durrësit nuk bie ndesh me Kushtetutën apo marrëveshjet ndërkombëtare

Gjykata Kushtetuese ka rrëzuar kërkesën e opozitës ku kërkohej anulimi i marrëveshjes me Emiratet e Bashkuara për projektin e Portit të Durrësit. Me argumentin se ishte një vendim antikushtetues dhe se binte ndesh me marrëveshjet ndërkombëtare, deputetët e opozitës kishin kërkuar nga Gjykata Kushtetuese që të anulonte vendimin ligjin që dhjetorit të vitit 2020.

Por organi më i lartë gjyqësor në vend ka konfirmuar se marrëveshja e nënshkruar nuk ka asnjë shkelje ligjore dhe se nuk bie ndesh me asnjë marrëveshje ndërkombëtare.

“Gjykata Kushtetuese e Republikës së Shqipërisë, pasi mori në shqyrtim në seancë plenare mbi bazë të dokumenteve çështjen me nr. 7 (Nj) 2022 të Regjistrit Themeltar, me kërkues jo më pak se një e pesta e deputetëve (36 deputetë) të Kuvendit të Republikës së Shqipërisë, me objekt: “ Shfuqizimi i ligjit nr. 145/2020, datë 03.12.2020 “Për ratifikimin e marrëveshjes për bashkëpunim ekonomik ndërmjet Këshillit të Ministrave të Republikës së Shqipërisë dhe Qeverisë së Emirateve të Bashkuara Arabe”, si i papajtueshëm me Kushtetutën dhe marrëveshjet ndërkombëtare.

Pezullimi i zbatimit të ligjit nr. 145/2020, datë 02.12.2020, derisa vendimi përfundimtar i Gjykatës Kushtetuese të hyjë në fuqi”, në mbështetje të neneve 131, pika 1, shkronjat “a” dhe “b” dhe 134, pika 1, shkronja “c”, të Kushtetutës, si dhe neneve 52, 52/a dhe 72 e vijues të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, me shumicë votash,

VENDOSI:

1. Rrëzimin e kërkesës.

Ky vendim është përfundimtar dhe hyn në fuqi ditën e botimit në Fletoren Zyrtare” shkruhet në faqen zyrtare të Gjykatës Kushtetuese.

Ndërkohë, vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar dhe nga Rregullorja për procedurat gjyqësore të Gjykatës Kushtetuese.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.