Shpenzimet dixhitale, prioritet për BE – Roli i tyre kyç në buxhetin e ri për vitin 2024

Buxheti i ri i Bashkimit Europian për vitin 2024 është i orientuar drejt tranzicionit dixhital. Komisioni Evropian ka propozuar një buxhet vjetor prej 189.3 miliardë euro për vitin 2024, me teknologjinë që luan një rol kyç. Sipas SEPE, buxheti do të plotësohet me një shumë të vlerësuar prej 113 miliardë eurosh në formën e pagesave për grante nën NextGenerationEU, instrumenti i rimëkëmbjes së BE-së pas pandemisë.

Shpenzimet e gjelbra dhe dixhitale do të vazhdojnë të jenë një prioritet për ta bërë Europën më elastike dhe më të përgatitur për të ardhmen, tha BE në një deklaratë për buxhetin e ri. Sipas arsyetimit të Komisionit, projektbuxheti për vitin 2024 drejton fondet atje ku mund të bëjnë ndryshimin më të madh, bazuar në nevojat më kritike të rimëkëmbjes së vendeve anëtare të BE-së dhe partnerëve në mbarë botën.

Financimi do të ndihmojë në modernizimin dhe forcimin e Unionit, duke promovuar tranzicionin e gjelbër dhe dixhital, duke krijuar vende pune dhe duke forcuar rolin e Europës në botë, komentoi Komisioni.

Edhe pse tranzicioni dixhital kalon horizontalisht në pothuajse të gjitha veprimet e financuara nga buxheti i ri, disa prej tyre janë thjesht të orientuara drejt dixhitalizimit. Për shembull, sipas projekt-buxhetit, 13.6 miliardë euro do të ndahen për kërkimin dhe inovacionin, duke përfshirë 12.8 miliardë euro për programin kryesor kërkimor ‘Horizon Europe’. Projektbuxheti përfshin gjithashtu financimin për Aktin Europian të mikroqarqeve nën programin ‘Horizon Europe’ dhe nëpërmjet rishpërndarjes nga programe të tjera.

Përveç kësaj, 4.6 miliardë euro do të drejtohen për investime strategjike europiane, nga të cilat 2.7 miliardë euro për mekanizmin “Lidhja e Evropës” që synon përmirësimin e infrastrukturës ndërkufitare, 1.3 miliardë euro për programin “Europa dixhitale” për të formësuar të ardhmen dixhitale të BE – së dhe 348 milionë euro për programin InvestEU për prioritetet kryesore. Ndërkohë, sipas parashikimeve të Komisionit, 2.1 miliardë euro do të ndahen për shpenzimet e destinuara për hapësirën.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.