Greqia kryeson renditjen vjetore sërish si ‘vendi i vitit’ në ekonominë globale!

Greqia kryesoi renditjen vjetore të The Economist të ekonomive të botës së pasur në 2023.

Studimi mbledh të dhëna për pesë tregues: inflacioni “bazë” – i cili përjashton komponentët e paqëndrueshëm si energjia dhe ushqimi; GDP; punësimi dhe performanca e tregut të aksioneve për 35 vende kryesisht të pasura globale.

Për të dytin vit radhazi, Greqia ka arritur rezultate të jashtëzakonshme. Me një normë rritjeje të PBB-së në 1.2%, Greqia dallohet ndër vendet e tjera për rritjen e saj të mprehtë në vlerën reale të tregut të aksioneve, e cila u rrit me 43.8% nga 2022 në 2023.

Sipas The Economist, investitorët kanë rivlerësuar kompanitë greke për shkak të zbatimit nga qeveria të një sërë reformash pro-tregut.

Greqia pret të marrë më shumë se 55 miliardë euro nga fondet strukturore dhe të rimëkëmbjes së BE-së deri në vitin 2027, të cilat ekonomistët vlerësojnë se do të kontribuojnë një pikë përqindje në rritje në vit. Investimet shihen të rriten me rreth 15.1% në 2024 më shumë se dyfish krahasuar me vitin e kaluar.

Vendi ende nuk është kthyer në ekonominë më të lulëzuar të fillimit të viteve 2010; megjithatë, Fondi Monetar Ndërkombëtar (FMN) i ka theksuar qartë përmirësimet.

“Perspektiva ekonomike e Greqisë është përmirësuar dukshëm me zgjerimin e PBB-së reale përtej nivelit të tendencës para pandemisë”, thuhet në një deklaratë të FMN-së. “Sistemi bankar ka qëndruar elastik me përmirësimin e bilanceve”, thuhet në të, duke vlerësuar dixhitalizimin e futur si rezultat i pandemisë që “mbrojti ndjeshëm produktivitetin dhe orët e punës gjatë krizës”.

I njëjti studim nxori në pah një situatë më pak se të lulëzuar në pjesën tjetër të Europës. Hungaria po përjeton një normë inflacioni bazë prej 11% nga viti në vit. Finlanda, e varur shumë nga furnizimet ruse me energji, po përballet gjithashtu me vështirësi.

Franca, Gjermania dhe Spanja po përballen me problemet e tyre. Spanja, në veçanti, duket se po përjeton një prirje thelluese të inflacionit me kalimin e kohës.

Ndërsa vetëm një pjesë e vogël e vendeve pësuan rënie të PBB-së, Irlanda raportoi rënien më të rëndësishme me 4.1% (megjithëse kjo shifër mund të mos e pasqyrojë plotësisht situatën për shkak të çështjeve të matjes në PBB-në irlandeze).

Si Britania ashtu edhe Gjermania shfaqën performancë më të ulët se sa pritej. Gjermania po përballet me pasojat e një goditjeje të çmimit të energjisë dhe konkurrencës së shtuar nga automobilat e importuar kinezë. Ndërkohë, Britania vazhdon të përballet me pasojat e Brexit-it, me shumicën e ekonomistëve që parashikojnë një rritje ekonomike të ulët në vitet e ardhshme.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.