Greva në aeroporte dhe bagazhe të humbura – Kaosi i krijuar prej javësh tashmë kushton 4 miliard euro

Kompanitë ajrore europiane rrezikojnë të mbyllin sezonin e verës me më shumë se 4 miliard euro minus për shkak të futurimeve të anuluara; pa llogaritur këtu dëmshpërblimet që duhet të paguajnë për pasagjerët të cilët kanë humbur valixhet e tyre. Kësaj shume i shtohen dhe të ardhurat e munguara nga parkimet, dyqanet, transporti publik, hotelet dhe cdo shërbim tjetër. Ky është vlerësimi i parë i pasojave të kaosit në qiejt europianë si pasojë e rikthimit masiv të udhëtarëve, dhe njëkohësisht mungesës së personelit. Sektori ka pushuar nga puna qindra mijëra persona për t’i mbijetuar pandemisë dhe kufizimeve për udhëtime. Por rezultati është se cdo ditë nga qershori deri në shtator, në arkat e linjave ajrore të Bashkimit Europian do të mungojnë 33 milion euro.

Të ardhurave të pakta i shtohet dhe kostoja e rritur për personelin, nga njëra anë për të zbutur zemërimin e sindikatave dhe nga ana tjetër për të përforcuar stafin. Kompania Norvegian Air, për shembull ka rritur me 3.7% pagat e pilotëve. Sipas të dhënave zyrtare nënpunësit e këtij sektori në të gjithë botën janë reduktuar nga 2.93 në 2.48 milion në periudhën 2019 – 2021.

Aeroporti i Amsterdam – që në 2020-ën pushoi nga puna rreth 10 mijë persona, do të paguajë 5.25 euro më shumë në orë për 15 mijë nënpunës, dhe pse ka ende probleme në menaxhimin e bagazheve. Ndërsa për personelin që merret me sigurinë, dhe që pranon të shtyjë pushimet përtej 15 shtatorit do të jepen 180 euro më shumë në muaj. Ndërsa ata që sjellin njerëz të rinj për t’u punësuar do të marrin një bonus prej 150 eurosh.

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.