Guvernatori i BQK, i prerë për dinarin serb – Ismaili: Ne vendosim rregulla dhe duhen zbatuar!

Guvernatori i Bankës Qendrore të Kosovës, Ahmet Ismaili mohoi në mënyrë të prerë mundësinë e shtyrjes apo të anulimit të vendimit për ndalimin e qarkullimit të dinarit serb në Kosovë nga 1 shkurti i këtij viti. Ai theksoi se duhet të zbatohen të gjitha rregullat që vendosen nga BQK.

I pyetur nga gazetarët nëse do të shtyhet ky vendim, ai ftoi qytetarët serbë t’i bashkëngjiten sistemit financiar të Kosovës.

“Qysh me shty, çka me shty, a i bien që me shty që të thuhet që prej nesërmit mund të hyjë një automjet pa rregull, i palicensuar, kush mund ta marrë këtë përgjegjësi, a është dikush prej BQK-së që mund ta presë këtë. Kjo mund ta ketë një kohë tranzicioni, ne nuk po merremi individualisht me qytetarët serbë. Ata janë të mirëseardhur e mirëpritur t’i bashkëngjitën sistemit financiar të Kosovës”, tha Ismaili.

Ai po ashtu tha se duhet të zbatohen të gjitha rregullat që vendosen nga BQK.

“Pozita e BQK-së nuk është politike. Ne vendosim rregulla dhe ato duhet zbatuar. Nëse për zbatimin e rregullave duhet një kohë e arsyeshme, është çështje që për neve këto janë rregulluat. Bile deri dje, se ka plot lloj deklarimesh që thonë se ka qenë e rregulluar, deri dje e sot, dhe në fund të janarit kanë mund të hyjnë mjete transportues në Kosovë me bo kesh dhe si ta fusin në Kosovë ta dërgojë ku ka dashtë”.

Nga ana tjetër dhe kryeministri i vendit Albin Kurti është shprehur kategorik për fillimin e zbatimit të këtij vendimi duke filluar që nga 1 shkurti. Ai tha se në katër komunat në veri janë katër degë të bankave dhe janë 15 institucione financiare jobankare ku do të mund të dërgohen dërgesat e pagesat dhe ku do të mund të merren të gjitha ato në euro. Kurti theksoi se euro është valutë që vjen nga BE-ja, dhe është mjeti i vetëm i pagesës edhe i shitblerjes i përcaktuar në mënyrë të qartë në RKS nuk është një çështje e negociueshme. Ai ka theksuar se rregulloret e BQK-së janë në përputhje me Kushtetutën dhe ligjin duke shtuar se vendimet e Bankës Qendrore të Kosovës  janë vendime të pavarura, sepse BQK-ja është institucion i pavarur.

Banka Qendrore e Kosovës ka miratuar një rregullore për operacionet për paratë e gatshme, e cila bën të qartë se monedha e vetme që lejohet për kryerjen e transaksioneve të pagesave me para të gatshme në të gjithë territorin e vendit është euro. Në Kosovë, në të gjitha vendbanimet me shumicë serbe, popullsia përdor dinarin serb për të kryer pagesa dhe ata që punojnë në institucionet serbe në Kosovë, i marrin edhe pagat me dinarë. Me dinarë paguhen edhe pensionet, sipas sistemit serb si dhe bonuset për fëmijë dhe ndihmat sociale. Gjithashtu, në zonat ku banojnë serbët, dinarët përdoren në objektet tregtare, ndërkaq në katër komunat me shumicë serbe në veri, çmimet janë me dinarë. Dinarët kanë ardhur në Kosovë nga Serbia përmes Bankës Kombëtare të Serbisë, e cila ka një kasafortë në Leposaviq, komunë në veri të Kosovës e banuar me shumicë serbe.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.