Humbjet nga taksa e jashtëzakonshme e energjisë – Kompanitë britanike e vlerësojnë në rreth 500 milionë fuçi gjatë 10 viteve

Vlera e taksave të jashtëzakonshme për prodhuesit britanikë të naftës dhe gazit në Detin e Veriut Britanik pritet të arrijnë në rreth 500 milionë fuçi gjatë dekadës së ardhshme.

Vitin e kaluar, Britania ka vendosur taksa të jashtëzakonshme mbi naftën dhe gazin, si dhe për burimet e rinovueshme, të cilat kompanitë thonë se prekin investimet dhe nga ana tjetër ka të ngjarë të rrisin varësinë e Britanisë nga karburantet e importuara dhe të prishin objektivat e saj klimatike.

Në sektorin e naftës dhe gazit, taksat mund të rezultojnë në investime të reduktuara nga 3 miliardë deri në 5 miliardë paund gjatë dekadës së ardhshme. Ky reduktim i investimeve pritet, pavarësisht një stimulimi tatimor prej rreth 91 pens për paund të shpenzuar për prodhimin e ri të hidrokarbureve.

Britania prodhoi më pak se 1.4 milionë fuçi ekuivalente nafte në ditë (boed) vitin e kaluar në Detin e Veriut, nga një rekord prej rreth 4.4 milionë në 1999. Britania, një importues neto i energjisë që nga viti 2004, mund të prodhojë 500 milionë fuçi më pak hidrokarbure, të mjaftueshme për gjashtë muaj.

Shifrat u publikuan pak ditë përpara se qeveria britanike të shpallë masat e sigurisë së energjisë, të cilat mund të përcaktojnë ndryshime në taksa dhe stimuj për investime për industrinë në det të hapur.

Prodhuesi më i madh i naftës dhe gazit në Britani, Harbour, ka njoftuar shkurtime të vendeve të punës dhe ka shmangur raundin e fundit të licencimit. TotalEnergies shkurtoi programin e saj të investimeve në Mbretërinë e Bashkuar me një të katërtën.

Ndërsa, zhvillimi i asaj që do të ishte ferma më e madhe e erës në botë në brigjet e Britanisë është në dyshim, pasi kompania Orsted ka nevojë për më shumë mbështetje për të vazhduar me projektin.

Dorina Kurtaj/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.