Inflacioni “goditi” ushqimet në 2023 – Shqiptarët shpenzuan më shumë për bulmet e zarzavate

Gjatë vitit 2023 shqiptarët shpenzuan më shumë për ushqime. Ndonëse, gjatë vitit të kaluar inflacioni i përgjithshëm regjistroi nivelin prej 4%, në grupin “Ushqime dhe pije joalkoolike” çmimet u rritën me 6.7%. Nëse do të bëjmë një rezyme të gjithë vitit që lamë pas, ky grupim ka pësuar rritje të vazhueshme. Por cilat janë nëngrupimet që kanë kontribuar në këtë rritje?

Në 4 muajt e parë të 2023, brenda grupit të ushqimeve dhe pijeve joalkoolike, çmimet e nëngrupit “qumësht, djathë dhe vezë” ka një rritje të ndjeshme duke filluar me 26.4% në janar, 28% në shkurt si dhe 20.6% në mars dhe 15.5% në prill.

Pasuese e tyre gjatë katër mujorit të parë janë nëngrupimet “peshk”, “mish”, “fruta”, “bukë dhe drithëra”, “zarzavate përfshirë patatet”, etj.

Të dhënat e INSTAT tregojnë se nëngrupi “zarzavate përfshirë patatet”, ka pësuar rritjen më të madhe në 8 muajt e tjerë të vitit 2023. Më konkretisht, ky nëngrupim në muajin maj ka shënuar një rritje prej 18.3%, ndërsa në muajin qershor ka rritjen më të madhe duke arritur në 26.1%. Për të vijuar me 21.6% në korrik ndërsa gushtin ka arritur në 20.8%.

Edhe në 4 mujorin e fundit të 2023 vijon që nëngrupi “zarzavate përfshrë patate”, të ketë rritje ku përkatësisht ka arritur në 24.1% në shtator, ndërsa në tetor 23.4%. Ky grupim i ka përmbyllur dy muajt e fundit me 21.2% në nëntor si dhe dhjetorin me 20.8%.

Gjithashtu nëngrupime të cilat kanë kontribuar në rritjen e çmimeve gjatë këtyre muajve janë “fruta”, “qumësht, djathë e vezë” “mish”, “sheqer, reçel, mjaltë, çokollata, ëmbëlsira”, “peshk”, etj.

Diamila Leka/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.