Inflacioni në Argjentinë arrin në 109% – Konsumatorët bëjnë sakrifica për të përballuar jetesën

Inflacioni në Argjentinë u rrit në 109% nga viti në vit në prill, sipas të dhënave të publikuara nga autoriteti kombëtar i statistikave, duke mposhtur parashikimet e analistëve dhe duke shkaktuar dëshpërim dhe zemërim tek konsumatorët të cilët janë të detyruar të bëjnë sakrifica gjithnjë e më të mëdha për të përballuar jetesën.

Ekonomia e tretë më e madhe e Amerikës Latine regjistroi inflacion prej 8.4% nga muaji në muaj në prill, më i lartë se parashikimet për 7.5%, duke e çuar atë në 108.8% nga viti në vit.

Rritja e çmimeve ka shtyrë një në katër argjentinas nën kufirin e varfërisë. Ekonomia e brishtë e Argjentinës, e cila është përballur 12 vjet me inflacion dyshifror, është goditur rëndë nga ndikimi i thatësirës së fundit në eksportet e sojës, misrit dhe grurit.

Monedha kombëtare humbi 20% të vlerës brenda një jave dhe muajin e kaluar në tregun e zi kursi i këmbimit arriti në 500 pesos për dollar. Çmimet e mallrave janë rritur edhe më shumë, ndërkohë që qeveria do ta ketë edhe më të vështirë të shlyejë borxhin e saj publik prej 44 miliardë dollarësh ndaj FMN-së.

Varfëria, e cila po zvogëlohej gradualisht për dy vjet, u rrit në vitin 2022 dhe tani rrënon 39.2% të popullsisë, me fjalë të tjera mbi 18 milionë qytetarë të vendit. Në buletinin e saj më të fundit, banka qendrore e Argjentinës parashikoi në fillim të majit se inflacioni do të kalonte 126% nga viti në vit këtë vit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.