Inflacioni në Britani prek nivelin më të ulët në më shumë se një vit!
Inflacioni në Mbretërinë e Bashkuar u lehtësua më shumë se sa pritej në qershor, duke u ngadalësuar në normën e tij më të ulët vjetore që nga marsi 2022, treguan të dhënat zyrtare të mërkurën. Çmimet e konsumit u rritën 7.9% muajin e kaluar krahasuar me një vit më parë, nga 8.7% në maj, tha Zyra për Statistikat Kombëtare. Ekonomistët e anketuar nga Reuters kishin parashikuar një rritje prej 8.2%.
Inflacioni bazë, i cili heq kostot e paqëndrueshme të ushqimit dhe energjisë dhe është një matës më i mirë i prirjes bazë të çmimeve, ra në 6.9%, nga 7.1% në maj, që ishte norma më e lartë në 31 vjet. Inflacioni i çmimeve të ushqimeve ra gjithashtu, në 17.3% nga 18.3% në maj, me çmimet ende në rritje muajin e kaluar krahasuar me një vit më parë, por me më pak se në maj.
Të dhënat do të ofrojnë lehtësim për Bankën e Anglisë, e cila ka rritur normat e interesit në çdo takim që nga dhjetori 2021, duke e çuar normën e saj bazë në 5% muajin e kaluar. Megjithatë, numrat nuk kanë gjasa të shmangin një rritje tjetër të normës kur banka qendrore të mblidhet më 3 gusht, sepse inflacioni vazhdon të ecë ndjeshëm mbi objektivin e tij prej 2%.
Rritja e fortë e pagave mbetet gjithashtu një rrezik kryesor për perspektivën e inflacionit. ONS tha javën e kaluar se paga mesatare e rregullt, e cila përjashton bonuset, u rrit 7.3% gjatë tremujorit mars-maj krahasuar me një vit më parë, duke shënuar një nga normat më të larta të rritjes që nga fillimi i regjistrimeve në 2001.
“Ndërsa Banka e Anglisë do të mirëpresë rënien e inflacionit, nuk ka gjasa të ndryshojë në mënyrë thelbësore qëndrimin e saj të politikës së ashpër”, tha kryeekonomisti i KPMG, YaelSelfin.
Rënia e inflacionit bazë dhe shërbimeve, e cila përfshin koston e gjërave si hotelet, prerjet e flokëve dhe ushqimi jashtë, mund të tregojë një dobësim të presioneve themelore inflacioniste, pas një vargu rritjesh të nxitura nga presionet e forta të pagave në tregun e punës. Inflacioni vjetor i shërbimeve ra nga 7.4% në maj në 7.2% në qershor.
Edel Strazimiri / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.