“Inflacioni u reduktua në 4%. Ekonomia u rrit 3,5%” – Guvernatori Sejko, i pranishëm në forumin e “Euromoney”

Në Shqipëri është arritur reduktimi i inflacionit nga piku prej 8.3% në nëntor 2022, në nivelin prej 4% në dhjetor 2023. Në të njëjtën kohë është siguruar dhe ruajtja e një rritjeje ekonomike solide prej rreth 3.5% për vitin 2023. Guvernatori i Bankës së Shqipërisë, Gent Sejko, i pranishëm në Forumin për vendet e Evropës Qendrore dhe Lindore, organizuar nga ”Euromoney”, ka bërë një rezyme të zhvillimeve në ekonominë e Shqipërisë. Sipas tij, Banka Qendrore ka ndjekur një cikël normalizimi të qëndrimit të politikës monetare gjatë vitit 2023, duke e rritur normën bazë të interesit deri në nivelin 3.25%.

Gjithashtu, ai u shpreh se aktualisht jetojmë në një botë me përparim të shpejtë teknologjik dhe industria financiare nuk është e përjashtuar prej tij. Përdorimi i të dhënave, inteligjencës artificiale, monedhave digjitale dhe inovacioni i sistemeve të pagesave kanë sfiduar praktikat dhe politikat ekzistuese të bankave qendrore. Ashtu si çdo zhvillim teknologjik, këto tendenca ofrojnë si mundësi, për sa i përket përfitimeve, ashtu edhe rreziqe, dhe të dyja këto aspekte duhet të vlerësohen dhe kuptohen me kujdes.

Gjatë këtij forumi dyditor, Guvernatori Sejko zhvilloi takime me përfaqësues të Bankës Evropiane për Rindërtim dhe Zhvillim me të cilët diskutoi mbi çështje të lidhura me procesin e ekuivalentimit të Bankës së Shqipërisë. Me asistencën e   BERZH, është kryer paraprakisht një vetëvlerësim i kuadrit ligjor e rregullativ mbikëqyrës me atë të Bashkimit Evropian. Ky vetëvlerësim u bazua në metodologjinë e re të publikuar nga Autoriteti Bankar Evropian (EBA) përgjatë vitit 2022.

Gjatë këtij procesi u evidentua një nivel i  lartë përafrimi i kuadrit tonë mbikëqyrës me atë në fuqi në Bashkimin Evropian. Me daljen e Shqipërisë nga lista e vendeve në monitorim të shtuar, në fund të vitit 2023, Guvernatori ka komunikuar me Autoritetin Bankar Evropian (EBA) duke shprehur gatishmërinë e Bankës së Shqipërisë për të realizuar procesin teknik të vlerësimit.

Dorian Koça / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.