“Integrimi europian, objektiv strategjik afatgjatë” – Sejko: Ky proces është një shtytës i fortë për reformat strukturore

Procesi i integrimit europian përbën një objektiv strategjik afatgjatë, pasi është një shtytës i fortë për reformat strukturore, për konvergimin e plotë me standardet e BE-së të institucioneve vendase, si dhe për përfarimin e përgjithshëm të politikave dhe rregulloreve. Deklarata është bërë nga Guvernatori i Bankës së Shqipërisë, Gent Sejko, gjatë konferencës së 9-të për vendet e Europës Qendrore, Lindore dhe Juglindore.

Për sa i përket Shqipërisë, Guvernatori theksoi se të gjitha këto veprime do të përmirësojnë thellësisht klimën e biznesit, do të tërheqin investime të huaja dhe rrisin produktivitetin e përgjithshëm të ekonomisë sonë.

Sipas Sejkos, bankat qendrore duhet të pranojnë rolin e tyre në këtë proces. “Ne duhet të mbetemi të përkushtuar ndaj mandatit tonë të stabilitetit të çmimeve edhe në këtë mjedis sfidues, si parakusht për stabilitetin financiar dhe rritjen afatgjatë.   Aktualisht,  kjo nënkupton marrjen e të gjitha masave të nevojshme për të përballuar inflacionin e lartë të vazhdueshëm”, theksoi Guvernatori.

Në këtë kuadër, Banka e Shqipërisë mbetet e angazhuar për të ndërmarrë masa të mëtejshme, nëse inflacioni rezulton të jetë më i qëndrueshëm dhe më këmbëngulës nga sa pritet aktualisht.

Sejkoi nënvizoi se, duhet të harmonizohen politikat, rregulloret dhe praktikat tona me ato të BQE-së dhe Sistemit Europian të Bankave Qendrore. Banka e Shqipërisë ka punuarvazhdimisht për të përmirësuar rregulloret e sektorit bankar me Parimet e Bazelit dhe legjislacionin e BE-së, ndërsa i është paraqitur një kërkesë zyrtare BQE-së, për marrjen e statusit të ekuivalencës mbikëqyrëse.

Gjithashtu, Banka e Shqipërisë ka rishikuar dhe përmirësuar sistemet e pagesave, duke miratuar pjesën përkatëse të legjislacionit të BE-së dhe synon të zbatojë një sistem pagesash të menjëhershëme të modeluar sipas linjave të atij që operohet nga Eurosistemi.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.