Nisin zjarret masive në Mesdhe si pasojë e temperaturave mbi 40 gradë!

Zjarret po përhapen masivisht në Mesdhe pasi temperaturat po vazhdojnë të rriten për shkak të valës aktuale të të nxehtit dhe si pasojë disa shtëpi janë djegur.

Në Greqi, erërat e forta po pengojnë punën e zjarrfikësve, të cilëve u është dashur të marrin pjesë në fronte të shumta në jug, lindje dhe perëndim të Athinës.

Tre qytete dhe një kamp veror me më shumë se 900 fëmijë janë evakuuar dhe sipas autoriteteve lokale Policia ka arrestuar një person të dyshuar për zjarrvënie. Zjarri i parë filloi në Kouvaras, 50 kilometra në juglindje të Athinës.

Greqia, së bashku me Italinë dhe Spanjën, është përfshirë nga një valë të nxehti që nga java e kaluar, me temperaturat që kanë arritur në 44 gradë Celsius në qendër të vendit.

Në Spanjë, zjarri që shpërtheu të shtunën në ishullin La Palma po dobësohet gradualisht, megjithëse ka ende disa fronte aktive. Autoritetet vlerësojnë se rreth 3,500 hektarë dhe 20 ndërtesa janë djegur.

Shumica e 4,000 njerëzve që u evakuuan të shtunën janë kthyer tashmë në shtëpitë e tyre. Vala e të nxehtit dhe rreziku i zjarreve ka mbërritur edhe në Itali, ku termometrat mund të kalojnë rehat 40 gradë këto ditë.

Parashikimet e kulmeve historike në ditët në vijim bënë që ministria e shëndetësisë të shpallte një alarm të kuq për 16 qytete, përfshirë Romën, Bolonjën dhe Firencen. Akropoli në Athinë, një nga atraksionet kryesore turistike të Greqisë, u mbyll për të tretën ditë të dielën gjatë orëve më të nxehta.

Policia po heton origjinën e zjarrit që shpërtheu mbrëmjen e së dielës në aeroportin e Katanias. Autoritetet kanë pezulluar të gjitha fluturimet deri të mërkurën.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.