Invalidët, me “shtëpi” të re në Surrel – Bashkia e Tiranës hap tenderin për shoqatën e paraplegjikëve dhe tetraplegjikëve

Shoqata Humanitare e Invalidëve Paraplegjik dhe Tetraplegjik të Shqipërisë së shpejti pritet të ketë një “shtëpi” të re. Parashikohet që kjo qendër të ngrihet në ish-pronën e një reparti ushtarak pranë kryeqytetit, në Surrel.

Nëpërmjet një fondi prej 1,862 milionë lekë, Bashkia e Tiranës ka hapur tenderin përkatës për studimin dhe projektimin, që do të kalojë në gjashtë faza deri në dorëzimin final, që më pas do t’u hapë rrugë punimeve në terren.

Në një sipërfaqe të përgjithshme trualli prej 3300 metër katrorë dhe sipërfaqe ndërtimi rreth 700 metër katrorë, pritet të ngrihet godina me ambiente specifike sipas kërkesave të veçanta të kësaj shoqate.

Në këtë territor ku ndodhet ambjentet egzistuese, do të ndërtohet një objekt i ri në funsion të Shoqatës Humanitare të Invalidëve, Paraplegjikëve dhe Tetraplegjikëve të Shqipërisë, me qëllimin që të plotësojë nevojat e veçanta për personat me aftësi të kufizuar.

Sipas dokumenteve të tënderit, ndërtimi i kësaj godine duhet të ketë të gjitha ambientet e nevojshme (kuzhinë, lavanderi, palestër për fizioterapi), qëndër rehabilitimi, qëndër erogoterapie (terapi argëtuese), qëndër pritëse si dhe një sallë të vogël konferencash.

Diamila Leka/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.