Investimet private në infrastrukturë gazi – Qeveria miraton rregullat, tarifa 5-30 mln lekë për të marrë miratimin

Çdo subjekt apo bashkim shoqërish mund të aplikojë për marrjen e një miratimi për ndërtimin dhe përdorimin e infrastrukturës së sistemeve të gazit, ndërkohë që Këshilli i Ministrave ka miratuar vendimit, që përcakton procedurat që duhet të ndjekin investitorët e interesuar. Vendimi specifikon dokumentet që duhet të paraqitet në ministrinë përgjegjëse për hidrokarburet.

Fillimisht subjektet që plotësojnë kriteret do të pajisen me një miratim paraprak, ndërsa më pas nevojiten dokumente shtesë, duke filluar nga studimi urbanistik për ndërtimin e  infrastrukturës së sistemeve të gazit, miratimi për zhvillimet transformuese në territor, në përputhje me legjislacionin për trashëgiminë kulturore; leja mjedisore, opinioni i Entit Rregullator të Energjisë, etj.

Ndërkaq, miratimin përfundimtar për zhvillimin e projektit e jep Këshilli i Ministrave, që duhet të miratojë kontratën e nënshkruar mes subjektit dhe ministrit përgjegjës për energjinë.

Vendimi i miratuar së fundmi në qeveri përcakton dhe tarifat që duhet të paguajnë subjektet për marrjen e miratimit për ndërtimin dhe përdorimin e infrastrukturës së sistemeve të gazit. Për projektet me vlerë investimi deri në 100 mln lekë, pagesa është 5 mln lekë, për investime deri në 300 mln lekë, tarifa është 10 mln lekë, ndërsa për projekte me vlerë investimi mbi 300 mln lekë, tarifa do të jetë 30 mln lekë.

Ndërkaq, sa i takon aplikimi për leje nga subjektet shtetërore, vendimi i qeverisë përcakton se ai bëhet në ministrinë përgjegjëse për energjinë, vetëm pasi të jetë realizuar në respektim të parashikimeve të ligjit për prokurimin publik përgatitja e projektit përfundimtar të ndërtimit.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.