Investitorët preferojnë dollarin si aset i sigurt – Përshkallëzimi i konfliktit rrit oreksin e tregjeve për monedhën e gjelbër

Dollari amerikan po qëndron në rënie të lehtë në sesionin e parë të kësaj jave, megjithatë po tregtohet pranë nivelit më të lartë në 1 javë, për shkak se luftimet në Lindjen e Mesme kanë rritur oreksin e investitorëve për asete të sigurta.

Forcat izraelite kanë vijuar bombardimet në Gaza edhe të hënën, pasi përpjekjet diplomatike për një armëpushim kanë dështuar. Indeksi që mat ecurinë e dollarit amerikan, përballë shportës me gjashtë monedhat kryesore ndërkombëtare po qëndron në rreth 106.4, ndërsa investitorët po presin edhe fjalimin e shefit të Rezervës Federale, Jerome Powell, më vonë gjatë kësaj jave. Powell mund të japë ndonjë detaj në lidhje me të ardhmen e normave të interesit në SHBA.

Analistët shprehen se, konflikti mes Izraelit dhe Hamasit vijon të sjellë paqëndrueshmëri për tregjet financiare dhe e ka drejtuar vëmendjen te asetet e sigurta. Njëkohësisht, edhe monedha e Izraelit, shekeli ka rënë në 3.99 dollarë, niveli më i ulët në 8 vitet e fundit, pasi kryeministri Benjamin Netanyahu deklaroi se do ta shkatërrojë Hamasin. Në fokus të tregjeve është edhe jeni japonez, që po tregtohet në 149.5 në raport me dollarin, shumë pranë nivelit sensitiv prej 150.

Disa tregtarë shohin shanse në rritje që autoritetet japoneze të ndërhyjnë për të stabilizuar monedhën vendase. Banka e Japonisë vijon të ndjekë politikën monetare ultralehtësuese, pavarësisht kërcënimeve të inflacionit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.