Italia, 2.2 miliardë euro ndihmë për zonat e përmbytura – Përjashtime nga taksat dhe kontribute të veçanta për familjet e bizneset
Qeveria italiane miratoi një paketë ndihme me vlerë më shumë se 2 miliardë euro për të ndihmuar zonat e goditura nga përmbytjet në rajonin e Emilia-Romagna të shkatërruar nga shirat e rrëmbyeshëm vdekjeprurës.
Gati një javë pas përmbytjeve për shkak të cilave humbën jetën 14 njerëz dhe mbi 20 mijë të tjerë u detyruan të braktisin shtëpitë e tyre, dhjetëra qytete dhe qyteza të vogla mbeten të zhytura në ujë dhe baltë, të cilat kanë shkatërruar mijëra hektarë tokë pjellore dhe kanë shkatërruar bizneset lokale.
Paketa e ndihmës, e miratuar gjatë një mbledhjeje urgjente të ekzekutivit, përfshin përjashtime nga taksat dhe kontribute të veçanta për familjet dhe bizneset e goditura rëndë nga përmbytjet – situata më e keqe në Itali në pothuajse një shekull.
Rreth 200 milionë euro janë caktuar për fermerët, për t’i ndihmuar ata të përballen me humbjet në të korrat e tyre dhe të zëvendësojnë makineritë e dëmtuara. 300 milionë euro shtesë do t’i shpërndahen kompanive në fushën e eksportit dhe 20 milionë euro shkollave.
Punëtorët që humbën përkohësisht vendin e punës do të përfitojnë rreth 600 milionë euro, ndërsa pagesat e taksave do të pezullohen deri në gusht si dhe pagesat për shërbimet komunale. Në një deklaratë të shkurtër për mediat kryeministrja italiane Meloni u shpreh se gjetja e 2 miliardë eurove në pak ditë nuk ishte një detyrë e lehtë.
Ekspertët e mjedisit theksuan se si ngjarje të tilla ekstreme të motit po bëhen gjithnjë e më të shpeshta në Itali, territori i brishtë i së cilës është veçanërisht i ekspozuar ndaj efekteve të ndryshimeve klimatike, duke nënvizuar nevojën për veprim dhe parandalim të menjëhershëm.
Dorina Kurtaj /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.