Italia “rregullon” taksën e kritikuar mbi bankat – Qeveria i jep mundësinë huadhënësve të rrisin rezervat

Italia do të rishikojë taksën e kritikuar mbi bankat duke u dhënë huadhënësve mundësinë për të rritur rezervat e tyre në vend që të paguajnë taksën. Muajin e kaluar, Roma u dha një goditje befasuese huadhënësve të saj duke vendosur një taksë prej 40% mbi të ardhurat që rrjedhin nga normat më të larta të interesit, pasi qortoi bankat për dështimin për të shpërblyer depozitat ndërsa Banka Qendrore Europiane rriti normat zyrtare.

Aksionet e bankës ranë përpara se ministria e Ekonomisë të sqaronte se nuk do të mblidhte më shumë se 0.1% të totalit të aktiveve të huadhënësve. Ndryshimet e propozuara, që do të miratohen javën e ardhshme nga Senati, vijnë pas kritikave nga sektori i industrisë, investitorët ndërkombëtarë dhe Banka Qendrore Europiane. Kjo e fundit u shpreh se taksa në fjalë mund të bëjë disa huadhënës të prekshëm ndaj një rënieje ekonomike.

Sipas një ndryshimi të qeverisë, tatimi që synon marzhin neto të interesit të bankave, një masë e fitimit që rezulton nga hendeku midis normave të kredisë dhe depozitave, do të kufizohet në 0.26% të ekspozimeve të ponderuara me rrezik.

Kushtet e reja favorizojnë bankat që mbajnë një përqindje më të lartë të obligacioneve qeveritare midis aktiveve të tyre, sepse ato kanë një peshë rreziku zero. Në vend që të paguajnë taksën, bankat mund të rrisin rezervat e tyre të pashpërndara me një shumë ekuivalente me dyfishin e tatimit dhe ta vendosin atë në mënyrë specifike në llogaritë e tyre.

Një opsion i tillë pritet të përjashtojë nga taksa bankat kooperativë, pasi ato zakonisht lënë mënjanë një pjesë të madhe të fitimeve të tyre si rezervë. Huadhënësit që zgjedhin të rrisin kapitalin mund ta shpërndajnë atë më vonë, por më pas ata do të duhet të paguajnë taksën plus interesin e ngarkuar në normën që BQE zbaton për depozitat e huadhënësve. Auditorët shtetërorë në Thesar miratuan versionin e fundit të propozimit të shtunën, sipas një dokumenti, duke shtuar se do të kërkohet një kufi maksimal tatimor të barabartë me atë të mëparshmin.

Kryeministrja italaine Giorgia Meloni në fillim të këtij muaji mbrojti arsyetimin për taksën duke lënë mudnësinë ndaj ndryshimeve, me kusht që të ardhurat të mbeten të pandryshuara në “pak nën” 3 miliardë euro). Roma synon të përdorë këto të ardhura për të financuar uljet e taksave dhe garancitë shtetërore për kreditë për ndërmarrjet e vogla dhe të mesme. Autoriteti i Konkurrencës do të monitorojë bankat për t’u siguruar që ato të mos i ngarkojnë klientët më shumë për shërbimet për të kompensuar taksën.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.