Kalendari i parë digjital për eventet e turizmit kulturor: TEA, aplikacioni i parë i krijuar në Shqipëri!

Krijohet TEA (Tourism Events of Albania), aplikacioni i parë i krijuar në Shqipëri, si kalendari i parë digjital për eventet e turizmit kulturor, sporteve dhe të traditës, i disponueshëm në Apple Store dhe në Play Store i cili është një projekt i Ministrisë së Turizmit dhe Mjedisit dhe i Agjencisë Kombëtare të Turizmit

Sipas njoftimit të ministrisë ky kalendar dhe aplikacion u prezantua sot para Piramidës, në prani të kryeministrit Edi Rama, Ministres së Turizmit dhe Mjedisit, Mirela Kumbaro, Ministres së Kulturës, Elva Margariti dhe drejtoreshës së Agjencisë Kombëtare të Turizmit, Zana Çelës.

Në aplikacionin TEA do të pasqyrohen eventet e kategorive të ndryshme si Art Fest, Trashëgimi Kulturore, Festivale Muzikore, Sport, Koncerte, Folklor, Festa Lokale, Arte Pamore, Agroturizëm e Kulinari dhe Teatër dhe ky aplikacion do të sjellë informacionin për çdo event, për çdo preference e grupmoshë, në shqip e në anglisht.

Bazuar në informacionin e publikuar për mediat çdo event brenda aplikacionit do të ketë faqen e tij të dedikuar me informacion të detajuar dhe përdoruesit do të njoftohen për eventet e tyre të preferuara kur data e tyre të afrojë.

Gjithashtu ndër veçoritë e tjera të këtij aplikacioni ministria bën me dije se TEA ka edhe disa butona të tjerë të dobishëm si p.sh., butoni “Vendndodhja” do t’i drejtojë ata në vendin e ngjarjes, butoni “Kalendari” e ruan ngjarjen në kalendarin personal të përdoruesit, duke u siguruar që ai të mos humbasë asnjë event për shkak të harresës në kohë, butoni “Share” që u lejon përdoruesëve të përhapin me lehtësi fjalën te miqtë dhe familjet e tyre si dhe së fundi, butoni “Zemra”  u lejon atyre të ruajnë ngjarjet e tyre të preferuara në skedën e preferencave, në mënyrë që t’i ri-vizitojnë ato në çdo kohë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.