Arabia Saudite investon 5.6 miliard dollarë në Kinë – Shuma e destinuar për automjetet elektrike të prodhuara në vend

Jo vetëm naftë: Arabia Saudite po investon 5.6 miliardë dollarë në automjete elektrike të prodhuara në Kinë. Palët nënshkruan një marrëveshje, qëllimi i të cilës është  zhvillimi i industrisë së prodhimit vendas të automjeteve me bateri

Ministria e investimeve e Arabisë Saudite nënshkroi një marrëveshje prej 5.6 miliardë dollarësh me prodhuesin kinez të makinave elektrike Human Horizons. Qëllimi është të bashkëpunojmë në zhvillimin, prodhimin dhe shitjen e automjeteve. Këtë e ka bërë të ditur agjencia shtetërore saudite e lajmeve.

Vetëm kjo marrëveshje përfaqëson më shumë se gjysmën e më shumë se 10 miliardë dollarëve në investime të nënshkruara gjatë ditës së parë të konferencës tregtare arabo-kineze që u zhvillua para pak ditësh në Riad.

Sektorët e investimeve variojnë nga teknologjia te energjia e rinovueshme, bujqësia te pasuritë e paluajtshme, metalet, turizmi dhe kujdesi shëndetësor.

Ndërsa marrëdhënia midis Arabisë Saudite, eksportuesi kryesor i naftës në botë, dhe Kinës mbetet e ankoruar në lidhjet energjetike, ka një shtytje për të rritur investimet në sektorët që nuk kanë të bëjnë me naftën, në kuadër të krijimit të një shtylle diversifikimi të mbretërisë.

Një pjesë e rëndësishme e planit saudit është zhvillimi i një industrie prodhuese vendase të automjeteve elektrike. Human Horizons prodhon automjete elektrike nën markën ‘HiPhi’ në Kinë.

Investimet e huaja direkte kineze në tregjet arabe arritën në 23 miliardë dollarë në vitin 2021, duke përfshirë 3.5 miliardë dollarë në Arabinë Saudite. ‘Horizons’ bëri të ditur se do të lançojë markën e saj premium ‘HiPhi’ në tregje të përzgjedhura europiane gjatë vitit 2023.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.