Birra me më pak alkool por me çmim fiks – Kompanitë britanike synojnë reduktimin e taksave

 Përmbajtja e ulët e alkoolit ul taksat për prodhuesit e birrës në Britani. Për këtë arsye kompanitë vendase po planifikojnë të ulin përqindjen e alkoolit për birrat por nga ana tjetër duke vendosur një cmim fiks. Nga ana tjetër britanikët akuzojnë këto kompani se po fusin në xhep paratë që kursejnë, në vend që t’ua kalojnë klientëve të tyre duke ulur çmimin.

Filloi me “tkurrjen”. Kur kostoja e prodhimit të produkteve të tyre u rrit, shumë industri ushqimore preferuan të tkurnin paketimin e tyre në vend që të rrisnin çmimet e tyre në një përpjekje për të “kamufluar” rritjen e çmimeve. Tashmë, britanikët po përballen gjithashtu me “deflacionin e pijes”: në vend që të rrisin çmimin e birrës, fabrikat e birrës po ulin përmbajtjen e saj të alkoolit.

Greene King, një zinxhir i madh birre dhe pijetoresh në Mbretërinë e Bashkuar, ka reduktuar përmbajtjen e alkoolit të birrës së saj të njohur, në 4.8% nga 5%. Në mars, prodhuesi më i vjetër i birrës në vend, Shepherd Neame, uli përmbajtjen e alkoolit të birrave të saj në 4.2% dhe 5.2% respektivisht, nga 4.5% dhe 5.4%.

Sipas hulumtimit të publikuar nga ‘Mail on Sunday’, prodhuesit e birrës nuk kanë ndryshuar madhësinë e shisheve dhe kanaçeve të tyre, por po shesin të njëjtën sasi me përmbajtje më të ulët të alkoolit. I njohur në vend me emrin ‘Drinkflation’, fenomeni është një tjetër version i tkurrjes, ku kompanitë ushqimore dhe supermarketet shesin më pak sasi të produktit pa ulur çmimet.

Sipas ligjit në Mbretërinë e Bashkuar, prodhuesit e birrës paguajnë më pak taksë për pijet me përqindje më të vogël alkooli. Por britanikët dhe mediat akuzojnë kompanitë se po fusin në xhep kursimet, në vend që t’ua kalojnë atë klientëve të tyre duke ulur çmimin.

Kompanitë nga ana e tyre argumentojnë se përmbajtja më e ulët e alkoolit thjesht i ka ndihmuar të kompensojnë disa nga kostot në rritje, pas viteve të “presioneve inflacioniste mbi lëndët e para, kostot e paketimit dhe çmimet e energjisë”. Reduktimi i alkoolit “zvogëlon taksën që paguajnë pa ndikuar ndjeshëm në shijen e birrës”, sipas tyre.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.