“Bileta e vetme” rrit inflacionin në Gjermani – Çmimi i saj për të gjithë transportin publik u vendos në 49 euro

Rritja e cmimit të asaj që njihet si ‘bileta e vetme’ në Gjermani, ka shkaktuar ngritjen e inflacionit. Me vendim të Berlinit, çmimi i biletës për të gjithë transportin publik u vendos në 49 euro nga 9.90 që ishte. Inflacioni në ekonominë më të madhe të Europës u përshpejtua në 7% në qershor nga 6.3% në maj.

Banka Qendrore Europiane mund të luftojë ashpër inflacionin duke rritur normat e interesit, siç janë duke vepruar shumica e bankave qendrore brenda dhe jashtë Europës, por përpjekjet e saj minohen nga ‘bileta e lirë e vetme’ në transportin publik gjerman. Çmimi prej 9.90 eurosh, vitin e kaluar iu ofrua qytetarëve nga qershori deri në gusht për t’ua lehtësuar qarkullimin dhe për t’i çliruar nga kostoja e lartë e energjisë. Me këtë biletë qytetarët mund të udhëtonin me tren, tramvaj dhe autobusët rajonalë.

Suksesi i saj ishte aq i madh dhe bileta e vetme u bë aq e njohur sa Berlini vendosi ta bëjë atë të përhershme këtë vit edhe pse çmimi i saj nuk është më aq i ulët, por shitet për 49 euro.

Megjithatë, ky dallim është i rëndësishëm. Sipas vlerësimeve të ekonomistëve të Bloomberg Economics, kjo diferencë çmimi do t’i japë një shtysë të re inflacionit vjetor të ekonomisë më të madhe të Europës, në një kohë kur indeksi tashmë është përshpejtuar në qershor në 7% nga 6.3% në maj. Dhe sigurisht ndikimi i këtij përshpejtimi do të ndihet edhe përtej kufijve të Gjermanisë pasi vlerësohet se do t’i shtojë rreth 0.2 pikë përqindje inflacionit të Eurozonës në qershor dhe përgjithësisht do të intensifikojë presionet inflacioniste deri në gusht.

Por kjo nënkupton se shpresat për një pauzë në rritjen e normave nga BQE dhe zhvendosjen e saj të paprecedentë drejt politikës monetare kufizuese po zbehen. Siç kanë theksuar disa drejtues të bankës, pauza mund të ndodhë vetëm kur të vendoset një tërheqje e zgjatur e presioneve inflacioniste. Zyra gjermane e statistikave pritet të publikojë të dhënat e reja për inflacionin më 29 qershor, që do të pasohet nga publikimi i të dhënave të inflacionit në Eurozonë. Ndërkohë, bankat qendrore vazhdojnë luftën kundër inflacionit.

 

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.