“Kina është një bombë me sahat” – Sipas Biden, problemet e brendshme ekonomike po ndjehen në gjithë botën

Presidenti i SHBA, Joe Biden, e konsideroi Kinën një “bombë me sahat” për shkak të sfidave të saj ekonomike dhe tha se vendi kishte probleme për shkak të rritjes së dobët.

“Ata kanë disa probleme. Kjo nuk është mirë sepse kur njerëzit e këqij kanë probleme, ata bëjnë gjëra të këqija, “tha Biden në një mbledhje fondesh politike në Utah. Vërejtjet e Biden të kujtojnë komentet që ai bëri në një mbledhje tjetër fondesh në qershor, kur iu referua presidentit Xi Jinping si një “diktator”.

Këto komente erdhën menjëherë pasi Sekretari amerikan i Shtetit, Antony Blinken, përfundoi një vizitë në Kinë që synonte stabilizimin e marrëdhënieve që Pekini i përshkroi si në pikën e tyre më të ulët që nga vendosja e lidhjeve formale në 1979.

Sektori i konsumit i Kinës ra në deflacion dhe çmimet e fabrikave vazhduan rënien në korrik. Kina mund të jetë duke hyrë në një epokë të rritjes ekonomike shumë më të ngadaltë me çmime të konsumit dhe paga në stanjacion, në kontrast me inflacionin kudo në botë.

Shtetet e Bashkuara, ekonomia më e madhe globale, ka luftuar inflacionin e lartë dhe ka regjistruar një treg të fortë pune.

“Kina është në telashe”, tha Biden, por nga ana tjetër shtoi se dëshironte një marrëdhënie racionale me këtë vend. Biden nënshkroi të mërkurën një urdhër ekzekutiv që do të ndalojë disa investime të reja amerikane në Kinë në teknologji të ndjeshme si çipat kompjuterikë. Kina, e cila është ekonomia e dytë më e madhe në botë, tha se ishte “shumë e shqetësuar” për këtë urdhër dhe rezervoi të drejtën për të marrë masa.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.