BQE me “dhimbje koke” prej Gjermanisë! – Duhet të ndryshojë kursin, për shkak se vendi ndodhet në prag recesioni

Banka Qendrore Europiane është në alarm dhe këtë herë lajmi i keq nuk vjen nga Greqia, Italia apo ndonjë prej vendeve të Europës Jugore. Anëtari më i madh dhe më i fuqishëm i Eurozonës, Gjermania, është goditur nga një përzierje toksike e tregtisë së dobët me partnerin kryesor Kinën, si dhe një rënie në sektorët e prodhimit dhe ndërtimit.

Problemet në Gjermani po pengojnë rritjen në Eurozonë në tërësi dhe po kërcënojnë ta çojnë atë drejt një recesioni. Kjo po detyron BQE që të ndryshojë mënyrën e sjelljes duke zgjatur në kohë rritjen e normave bazë të interesit.

Analistët e tregut mendojnë se banka qendrore duhet të marrë vendime të tjera, siç bëri në kohën e ciklit të saj të fundit shtrëngues në vitin 2011 për shkak të krizave të borxhit në Greqi, Portugali, Irlandë, Spanjë dhe Qipro.

Ndryshe nga atëherë, Gjermania dhe jo Jugu i Evropës është në epiqendrën e problemit. Disa nga problemet aktuale të Gjermanisë kanë origjinën në Rusi, në të cilën Berlini ishte mbështetur për një të tretën e furnizimit me energji, por pushtimi i Ukrainës rrezikoi ato importe të lira.

Por, probleme të tjera të ekonomisë gjermane janë të brendshme, si varësia e madhe nga eksportet, mungesa e investimeve dhe e fuqisë punëtore. Sipas analistëve, nëse qeveria nuk merr masa vendimtare, Gjermania mund të mbetet në fund përsa I përket rritjes ekonomike në Eurozonë.

Banka Qendrore ka ulur me vetëdije aktivitetin ekonomik nëpërmjet normave më të larta, në përpjekje për të sjellë inflacionin, i cili në një moment të vitit të kaluar ishte dyshifror, në objektivin e saj prej 2%. Por, kostot më të larta të huamarrjes i dëmtojnë veçanërisht prodhuesit, sepse varen nga investimet dhe asnjë vend i Eurozonës nuk ka një sektor industrial më të madh se Gjermania.

Analistët shprehen për lehtësim të politikës monetare. Kjo situatë e vendos BQE në një moment ku duhet të mendojë për të përfunduar ciklin e saj shtrëngues, përpara se të dëshmojë rënien e qëndrueshme të inflacionit bazë.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.