Kina planifikon të prodhojë robotë humanoidë në masë që mund të “ndryshojnë botën” brenda 2 viteve!

Kina ka zbuluar plane ambicioze për të prodhuar në masë robotë humanoidë, të cilët beson se do të jenë po aq “revolucionarë” sa ardhja e smartfonëve. Në një dokument ambicioz të publikuar javën e kaluar, Ministria e Industrisë dhe Teknologjisë së Informacionit të Kinës tha se robotët do të “ndryshojnë botën”.

MIIT beson se deri në vitin 2025 këto produkte do të arrijnë një “nivel të avancuar” dhe do të përhapen gjerësisht. Këto deklarata janë bërë në lidhje me qëllimet e zhvillimit të listuara në udhërrëfyes. Pritet që “ata do të bëhen të njëjtat teknologji përparimtare si kompjuterët, telefonat inteligjentë dhe makinat e reja elektrike”. Shumë kompani globale tashmë po zhvillojnë në mënyrë aktive robotë humanoidë të avancuar.

Kompania kineze Fourier Intelligence tha se do të fillojë prodhimin masiv të robotit të saj humanoid GR-1 deri në fund të këtij viti, raporton South China Morning Post. Kompania e Shangait i tha botimit se në vitin 2024 synon të lëshojë mijëra robotë të aftë të lëvizin me shpejtësi 5 km/h dhe të mbajnë 50 kg.

Nuk është i vetmi prodhues i robotëve humanoid që po shton përpjekjet e tij për t’i prodhuar ato në masë. Kompania amerikane Agility Robotics po hap një fabrikë të prodhimit të robotëve në Oregon më vonë këtë vit, ku planifikon të krijojë qindra robotë të saj dykëmbësh që mund të imitojnë lëvizjet njerëzore si ecja, ulja dhe mbajtja e ngarkesave.

Amazon po teston robotin Digit të Agility Robotics në një objekt kërkimi dhe zhvillimi pranë Seattle për të eksploruar se si mund të përdoret për të automatizuar magazinat e saj, por testimi është vetëm në fazën eksperimentale.

CEO i Agility Robotics, Damion Shelton tha për Insider: “Në afat të afërt, ne presim rritje të ngadaltë dhe të qëndrueshme në adoptimin e Digit”. Ai shtoi: “Ne besojmë se përfundimisht do të ketë integrim masiv, por robotët me dy këmbë janë ende një zhvillim relativisht i ri.”

Edhe Tesla po zhvillon robotët e saj humanoidë të quajtur Optimus, ose Tesla Bot, siç njoftoi Elon Musk në 2021. Megjithatë, është ende shumë larg prodhimit masiv, siç tha Musk në ngjarjen e Ditës së Tesla AI 2022 se kjo ishte hera e parë prototipi po funksiononte “pa asnjë mbështetje” kur doli në skenë.

Por gjithçka mund të ndryshojë shumë shpejt duke pasur parasysh shfaqjen e inteligjencës artificiale të avancuar, e cila tashmë ekziston dhe zbatimi i saj në robotë, do të bëjë të mundur që të bëhet një hap i jashtëzakonshëm në zhvillimin e këtyre teknologjive.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.