BE: Hendeku gjinor i pagave ende në 13% – Femrat europiane paguhen më pak se meshkujt për të njëjtën punë

Femrat në Europë paguhen ende më pak se meshkuj që bëjnë të njëjtën punë. Sipas komisionit të Bashkimit Europian hendeku gjinor i pagave ka mbetur në nivelin e 13%. Hendeku gjinor i pagave është ulur me 2.8 pikë përqindjeje gjatë dekadës së fundit, por komisioni dëshiron ta përshpejtojë këtë progres

Femrat europiane ende fitojnë mesatarisht 13% më pak se meshkujt që bëjnë të njëjtën punë, sipas përfundimeve të arritura në një raport të komisionit europian.

Në vitin 2023, për çdo 1 euro që fiton një mashkull, një femër fiton 87 cent. Norma është e njëjtë me atë të vitit 2022. Hendeku gjinor i pagave – diferenca në pagën mesatare midis punëtorëve meshkuj dhe femra – është ulur me 2.8 pikë përqindjeje gjatë dekadës së fundit, por komisioni dëshiron ta përshpejtojë këtë progres.

Në deklaratën për media të komisionit thuhej se paga e barabartë për të njëjtën punë ose punë me vlerë të barabartë është një nga parimet themeluese të BE-së, i parashikuar në Traktatin e Romës në 1957 – ën. Megjithatë, përparimi në eliminimin e hendekut gjinor në paga ka qëndruar pezull këtë vit dhe ka qenë i ngadaltë gjatë viteve.

Komisioni Europian përcaktoi një strategji për të zhdukur hendekun gjinor të pagave deri në vitin 2025, tre vjet më parë. Direktiva për Transparencën e Pagave u prezantua në qershor 2023, duke bërë të mundur që punëtorët të përcaktojnë nëse janë duke u diskriminuar, ose që punëdhënësit të sigurohen se po zbatojnë parimet e pagës së barabartë.

Komisioni tha gjithashtu se ka caktuar 6.1 milionë euro për të ndihmuar shtetet anëtare të zbatojnë direktivën, duke iu dhënë tre vjet kohë për ta bërë këtë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.