Greqia, me ligj të ri kundër evazionit fiskal – Paketa e masave publikohet për konsultim publik

Projektligji “Masat për kufizimin e evazionit fiskal” i Ministrisë së Ekonomisë dhe Financave të Greqisë është hedhur në konsultim publik. Një prej ndërhyrjeve të parashikuara është dhe ndalimi i përdorimit të parave cash në shitjen dhe blerjen e pasurive të paluajtshme.

Ministri grek i Ekonomisë Kostis Hatzidakis tha se ky projektligj është një përpjekje serioze reformuese për të shmangur evazionin fiskal. Qeveria ndërhyn në nivele të ndryshme për të patur rezultate të prekshme për këtë problem të madh, duke filluar nga zgjerimi i transaksioneve elektronike, kufizimi përdorimi i parave të gatshme, masa të rrepta për të luftuar kontrabandën, modernizimi i kuadrit për qiratë afatshkurtra, një mënyrë më e drejtë e taksimit të profesionistëve të lirë, në mënyrë që punonjësit dhe pensionistët të mos ndihen të viktimizuar nga politika tatimore. Me të gjitha këto iniciativa, sipas tij do të mund të reduktohet evazioni fiskal dhe të mbështetet politika sociale e vendit në përputhje me rrethanat, duke filluar nga shëndetësia dhe arsimi.

Ai theksoi se projektligji është vënë në diskutim në pritje të vëzhgimeve, komenteve, kundërshtimeve, kundërpropozimeve.

Një pikë tjetër e rëndësishme e këtij projektligji është edhe zgjerimi i teknikave të kontrollit indirekt për përcaktimin e të ardhurave. Këto teknika bazohen në evidenca të tilla si depozitat bankare, shpenzimet në para, likuiditeti i tatimpaguesit etj. Dispozita parashikon që teknikat indirekte do të përdoren edhe në tre raste të tjera si për shembull kur deklarohet një humbje për të paktën tre vite radhazi dhe nuk shfaqet mënyra e financimit të biznesit me të cilin mbulohen detyrimet e tij; kur ka një mospërputhje të konsiderueshme midis blerjeve, shitjeve dhe inventarëve; kur norma e fitimit bruto që rezulton nga rezultatet e deklaruara është e ndryshme nga ajo që rezulton nga dokumentet e blerjes dhe shitjes.

Nga ana tjetër parashikohet një ulje më e madhe e taksave për kostot e rehabilitimit të ndërtesave. Shpenzimet për blerjen e mallrave dhe marrjen e shërbimeve që lidhen me përmirësimin energjetik, funksional dhe estetik të ndërtesave, të cilat nuk janë përfshirë, ose nuk do të përfshihen në një program të veçantë, reduktohen, shpërndahen në mënyrë të barabartë për një periudhë pesëvjeçare. Ulje do të ketë dhe për tatimin mbi të ardhurat e personave fizikë, me kufi maksimal të shpenzimeve totale 16 mijë euro.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.