Kodi tatimor italian “flet” edhe shqip – Guida e Agjencisë së të Hyrave tashmë përmban 17 gjuhë

Nga shqipja tek urdu, gjuha e folur në Pakistan, arabisht, rumanisht, etj. Kodi i identifikimit tatimor i lëshuar nga Agjencia e të Hyrave (Administrata tatimore) tashmë është në 17 gjuhë. Agjencia ka publikuar një guidë për të lehtësuar komunitete të ndryshme që jetojnë dhe punojnë në Itali dhe për t’u lejuar atyre që të kenë një kod, i cili identifikon një qytetar në marrëdhëniet e tij me administratën publike dhe që është i nevojshëm për t’u regjistruar në Shërbimin Kombëtar Shëndetësor, ku ka mundësi të zgjedhë edhe mjekun.

Guida, përveçse përmban gjuhët kryesore europiane, si ato gjermane, franceze, angleze, spanjolle dhe portugeze, është realizuar për të ndihmuar edhe ata persona, të cilët flasin gjuhë të tjera, që nga ato të vendeve të tjera europiane, si shqip, sllovenisht, rumanisht, ukrainase dhe rusisht, por edhe të vendeve më të largëta, si arabisht, bengaleze, kineze, hindi, tagalog, që flitet në Filipine dhe urdu.

Çfarë është kodi i identifikimit tatimor, karakteristikat që shpjegojnë shkronjat dhe numrat dhe përse shërben e si lëshohet, janë informacionet që shpjegohen në guidën e Agjencisë, e cila ndalet edhe në modalitetet që duhet të ndiqen për të huajt që dëshirojnë ta marrin. Zakonisht, për shtetasit e huaj që mbërrijnë në Itali, kodi i identifikimit tatimor lëshohet ose në një sportel unik për imigracionin në çdo prefekturë, nëse kërkon bashkim familjar dhe për punësim, ose në kuesturë, zyrat e Policisë së Shtetit, për të huajt që kërkojnë modalitete të tjera për lejen e qendrimit.

Mekanizma të ndryshme parashikohen për qytetarët e huaj, të cilët kërkojnë mbrojtje ndërkombëtare, si dhe për minorenët e huaj pa dokumente, ose të pa shoqëruar. Një procedurë speciale pritjeje është parashikuar edhe për refugjatët ukrainas, që kalon nëpërmjet kuesturës.

Të huajt, të cilët jetojnë e punojnë rregullisht në Itali, por që nuk kanë ende kodin e identifikimit tatimor, mund ta kërkojnë atë në çdo zyrë të Agjencisë së të Hyrave. Kërkesa duhet të motivohet dhe shoqërohet nga një dokument. E njëjta gjë vlen edhe për qytetarët e Bashkimit Europian, të cilët gjithsesi mund të përfitojnë Shërbimin Kombëtar Shëndetësor me dokumentin e lëshuar nga vendi i tyre i lindjes.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.