Komisioni Europian merr “pushtetin” e emergjencës – Rregulla të reja për krizën e furnizimit në tregun e përbashkët

Kompanitë me bazë në Europë mund të jenë të detyruara t’i japin prioritet prodhimit të produkteve kryesore si dhe të krijojnë rezerva me mallra sipas projekt rregullores së Bashkimit Europian, që do t’i japin Komisionit Europian kompetenca emergjente për të trajtuar krizën e furnizimit.

Instrumenti i propozuar i emergjencave të tregut të përbashkët, vjen në formën e një reagimi ndaj pengesave të furnizimit shkaktuar nga pandemia e Covid-19 si dhe pushtimi i Rusisë në Ukrainë. Masa të ngjashme janë miratuar më parë dhe në Shtetet e Bashkuara të Amerikës dhe Japoni.

Por këtë herë propozimi pritet të përballet me një reagim të ashpër nga bizneset dhe disa prej vendeve anëtare të Bashkimit Europian, të shqetësuar se kjo përbën një tejkalim të kompetencave ekzekutive të komisionit europian.

Drafti i rregullave, në fakt, fuqizon komisionin që të urdhërojë shtetet e BE-së të riorganizojnë zinxhirët e furnizimit dhe të rrisin furnizimet e mallrave të lidhura me krizën sa më shpejt të jetë e mundur, duke përfshirë zgjerimin apo ripërdorimin e kapaciteteve ekzistuese të prodhimit; ose ngritjen e strukturave të rejave për të siguruar vendosjen e mallrave të rëndësishme në treg. Bizneset do të mund të detyrohen që të kenë prioritet prodhimin e mallrave të caktuara.

Kritikët shprehen se rregullat ngjajnë me kapitalizmin shtetëror të stilit kinez dhe mund të përbëjnë shkelje të detyrimeve kontraktuale të kompanive; si dhe të ekspozojnë sekretet e korporatave.

Bizneset që japin informacion të pasaktë ose të rremë rrezikojnë një gjobë prej 300 mijë euosh, ndërsa ato që nuk respektojnë një urdhër të tillë do të gjobiten në mënyrë periodike ditore prej prej 1.5% të xhiros mesatare ditore.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.