Kompanitë punësuan 535 të papunë çdo muaj – Programet subvencionuese, të punësuarit nga shtresat vulnerabël

Programet e nxitjes së punësimit të aplikuara nga Agjencia Kombëtare e Punësimit dhe Aftësive kanë filluar të japin efektet e para përgjatë këtij vitit. Sipas të dhënave zyrtare të këtij institucioni janë 3211 punëkërkues të papunë që janë punësuar në 6 muajt e parë të 2022, apo mesatarisht 535 të papunë çdo muaj, të cilët janë kryesisht punëkërkues anëtarë të skemës së ndihmës ekonomike, të rinj, persona me aftësi të kufizuar si dhe punëkërkues afatgjatë të cilët kanë mbi 1 vit të regjistruar në zyrat e punësimit.

Në Prill të këtij viti Agjencia Kombëtare e Punësimit dhe Aftësive çeli thirrjen për mbështetjen e bizneseve me qëllim rritjen e të punësuarve, ku  fondi i vënë në dispozicion në total përgjatë gjithë vitit është 550 milionë lekë.

Ky është një program për punësim 1-vjeçar i cili synon të përshtatë nevojat e individëve të papunë me kërkesën e punëdhënësit duke i subvencionuar ato.  Për te punësuar këta punëkërkues, punëdhënësit subvencionohen nga buxheti i shtetit me financim deri në 12 paga.

Ndërkohë që risia për këtë vit, është që për t’ju ardhur ne ndihmë personave që kanë pengesa të tjera për te filluar punë, përmes këtij programi, ofrohet subvencionim për shpenzimet e transportit dhe ndjekjen e çerdhes ose kopshtit të fëmijëve në ngarkim.Ndërsa për personat me aftësi të kufizuar, programi subvencionon edhe përshtatjen e vendit të punës.

Në total Agjencia Kombëtare e Punësimit dhe Aftësive aplikon 5 programe punësimi për integrimin në treg të kategorive të ndryshme.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.