“Konkurrenca” pezullon marrëveshjen për patentat – Vendimi: Ka rrezik të sjellë dëm të rëndë dhe të pariparueshëm për konsumatorët

Komisioni i Konkurrencës ka vendosur të ndalojë përkohësisht zbatimin e marrëveshjes të lidhur mes Drejtorisë së Përgjithsme të Shërbimeve të Transportit Rrugor, Drejtorisë së Përgjithsme të Tatimeve dhe 2 shoqatave të autoshkollave, në lidhje me përcaktimin e tarifës së pagesës dhe kostos minimale fiskale për përgatitjen dhe pajisjen me leje drejtimi.

Marrëveshja e lidhur në datë 13 shkurt 2023 parashikon rritjen e ndjeshme të çmimit të patentave, ku për kategorinë B çmimi do të shkojë 85 mijë, nga 45 mijë që është aktualisht.

Përmes një njoftimi për shtyp, Autoriteti i Konkurrencës bëri me dije Akt Marrëveshja  e lidhur mes 2 institucioneve publike dhe 2 shoqatave përfaqësues të autoshkollave, nëpërmjet përcaktimit të tarifës minimale ka rrezik eminent të sjellë një dëm të rëndë dhe të pariparueshëm për konkurrencën në ofrimin e këtyre shërbimeve, duke reduktuar seriozisht përfitimet që tregjet konkurruese ofrojnë për konsumatorët.

Për këtë arsye është kërkuar depozitimi i të gjithë praktikës së ndjekur deri në nënshkrimin e saj, për të kryer vlerësimin ligjor, nëse ka shkeleje të ligjit “Për mbrojtjen e konkurrencës”.

Sipas njoftimit për shtyp, masa e përkohëshme merret për një periudhë kohore deri në përfundim të procedures administrative dhe marrjen e vendimit përfundimtar të Komisionit të Konkurrencës. Rritja dhe fiksimi i çmimeve për pajisjen me patentë u argumentuan nga përfaqësues të DPSHTRR dhe autoshkollave me rritjen e cilësisë së shërbimit, si dhe luftën ndaj evazionit fiskal.

Ola Mitre/ SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.