Korrik-shtator, Qeveria 800 Mln euro borxh në tregun e brendshëm – Pas Eurobondit në Qershor, Ministria e Financave ul emetimet e bonove dhe obligacioneve

Ashtu siç ka bërë vazhdimisht gjatë dy viteve të fundit, Qeveria do t’i drejtohet më së shumti tregut të brendshëm për të marrë borxh. Për tremujorin e tretë të këtij viti Qeveria planifikon të marrë thuajse 800 milionë euro borxh përmes emetimit të letrave me vlerë, gjithësesi në rënie të dukshme krahasuar me dy tremujorët e mëparshëm.

Ministria e Financave ka publikuar kalendarin e emetimeve të letrave me vlerë për tre muajt e ardhshëm, korrik gusht, shtator. Bie në sy se vlera e emetimeve është dukshëm më e ulët nga dy tremujorët e mëparshëm, gjë që lidhet edhe me eurobondin prej 600 milionë eurosh të emetuar në fillim të qershorit. Për tremujoron e tretë, vlera totale e bonove e obligacioneve të emetuara nga Ministria e Financave do të jetë 83 miliardë lekë, apo afërsisht 800 milionë euro. Tremujori me huamarrjen më të madhe për këtë vit është i pari, me 121 miliardë lekë dhe i dyti me 96.5 miliardë lekë.

Shuma më e madhe e borxhi në tregun e brendshëm është parashikuar në muajin gusht, kur Qeveria do emetojë bono e obligacione me vlerë 33.6 miliardë lekë. Në muajin korrik është parashikuar të emetohet një total prej 29.2 miliardë lekësh, ndërkohë që vlera më e ulët i përket shtatorit. Në këtë muaj Ministria e Financave do emetojë një total bonosh e obligacionesh me vlerë 20.2 miliardë lekë.

Totali i emetimeve për vitin 2023 pritet të jetë rreth 380.5 mld lekë gjatë vitit 2023. Instrumenti me emetime më të shpeshta dhe me shumë më të lartë pritet të jetë bono e thesarit 12-mujore.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.