Kostot e duhanit dhe alkoolit – Raporti/ Franca humbet më shumë nga përdorimi, sesa fiton në taksa

Një raport i ri ka zbuluar se qeveria e Francës humbet më shumë para’ për shkak të jetëve të humbura dhe shpenzimeve parandaluese për përdorimin e alkoolit dhe duhanit, sesa fiton nga taksat mbi këto produkte.

Pirja e duhanit shkaktoi më shumë se 73,000 vdekje në vitin 2019 dhe konsumi i alkoolit mbi 41,000 vdekje. Raporti vlerësoi se “kosto sociale” për shtetin arrin në 156 miliardë euro për pirjen e duhanit dhe 102 miliardë euro për alkoolin.

Ky vlerësim merr parasysh vlerën ekonomike të jetëve të humbura për shkak të përdorimit të drogës, humbjen e cilësisë së jetës për pacientët me kancer të shkaktuar nga përdorimi i duhanit dhe alkoolit, si dhe shpenzimet shtetërore për parandalimin dhe kujdesin shëndetësor.

Kursimet në pensione për ata që humbasin jetën për shkak të përdorimit të drogës, alkoolit dhe duhanit janë zbritur nga vlerësimi i kostos sociale. “Ky vlerësim i ri konfirmon se kosto sociale e barnave mbetet shumë më e lartë se të ardhurat nga taksat,” përfundon raporti.

Qeveria franceze mori respektivisht 4 miliardë dhe 13 miliardë euro nga taksat mbi alkoolin dhe duhanin.

Megjithatë, raporti vuri në dukje se rënia e numrit të vdekjeve të shkaktuara nga alkooli, duhani dhe drogat e paligjshme midis viteve 2010-2019 tregon se politikat publike kanë bërë të mundur “reduktimin e ndjeshëm të konsumit të duhanit, përmirësimin e kujdesit për përdoruesit e drogave të paligjshme dhe në mënyrë më modeste, të rrisë ndërgjegjësimin për rreziqet e alkoolit”.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.