Kredia në euro, për çfarë qëllimi merret nga bizneset? – Pjesa dërrmuese për blerje pronash. Peshë të madhe overdrafti dhe huaja për likuiditete

Ndërsa kredia në euro ka shënuar një lloj frenimi gjatë gjysmës së parë të këtij viti, ajo vijon të merret nga subjektet shqiptare kryesisht për investim në pasuri të paluajtshme e për blerje paisjesh. Sipas të dhënave zyrtare të Bankës së Shqipërisë, këto dy qëllime përdorimi, zënë peshën më të madhe të kredisë në monedhën e përbashkët europiane. Më specifikisht, totali i kredisë në euro në fund të gjashtëmujorit të parë rezulton 209 miliardë lekë, afërisht 2 miliardë euro me kursin e sotëm.

Peshën më të madhe të këtij totali, rreth 75 miliardë lekë e zë kredia për blerje pasusrish të paluajtëshme. Në vend të dytë për nga qëllimi i përdorimit renditet kredia për blerje paisjesh e makinerish. Për këtë qëllim janë marrë nëpër banka një total kredish prej 56.6 miliardë lekësh. Overdrafti është i treti për nga pesha, me 47.7 miliardë lekë, i pasuar nga kredia për kapital qarkullues me 29 miliardë lekë.

E parë në terma të gjerë, Kredia për biznese është rritur mesatarisht me 5% në tremujorin e dytë, duke shfaqur ngadalësim të mëtejshëm me 0.4 pikë përqindje më pak se një tremujor më parë. Zhvillimet brenda segmenteve kryesore tregojnë që norma më të larta të rritjes së kredisë për likuiditete, të cilat kanë kompensuar disi ngadalësimin e mëtejshëm të kredisë për investime. Kështu, kredia për likuiditete u rrit mesatarisht me 6.8% krahasuar me 6.1% në tremujorin e parë.

Ndërkohë, kredia për investime u rrit me 3.8% ose 1 pikë përqindje më pak se në tremujorin e parë. Zgjerimi i kredisë është vërejtur më së shumti tek bizneset që ushtrojnë aktivitetin e tyre në sektorin e tregtisë dhe akomodimit, në sektorin e shërbimeve dhe në atë të ndërtimit.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.