Kredia për ekonominë rimëkëmbet në dhjetor, rritje 4.2% – Biznesi, situatë të mirë financiare në 2023. Ul nevojën për huamarrje

Kredia për ekonominë ka shënuar rritje të fortë gjatë dhjetorit që sapo lamë pas duke kompensuar disi ritmet e ulëta të kreditimit që u vërejtën në përgjithësi gjatë vitit 2023. Ajo e ka mbyllur dhjetorin me një total prej 743,7 miliardë lekësh, nga 722,2 miliardë në nëntor.

Diferenca muaj me muaj është e konsiderueshme, në vlerën 21.5 miliardë lekë, apo afërisht 210 milionë euro. E matur me dhjetorin e vitit të shkuar, kredia në fund të vitit 2023 rezulton 4.2% më e lartë, me një shtesë prej afërisht 30 miliardë lekësh apo afo 300 milionë eurosh.

Kredia për biznesin ka shënuar një përmirësim të lehtë në dhjetor. Nga 405,8 miliardë lëke në nëntor, ajo është shtuar me më shumë se 15 miliardë lekë në muajin e fundit të vitit, duke shkuar në 421,9 miliardë lekë.

Krahasuar me dhjetorin e vitit të shkuar, kredia për biznesin është rritur me 2.4%. Dhjetori ka qenë veccanërisht pozitiv për kredinë në euro, e cila kishte shënuar tkurrje të fortë në muajt e mëparshëm pas ndërhyrjeve të njëpasnjëshme të bankës Qendrore Evropiane në normën bazë të interesit. Nga ekuivalenti prej 211,1 miliardë lekësh në nëntor, kredia në monedhën e përbashkët evropiane është rritur në 225 miliardë lekë në fund të dhjetorit. Gjithësesi, ajo mbetet larg vlerave të fundit të vitit të shkuar.

Më modeste ka qenë në nëntor rritja e kredisë për bizneset në lekë, e cila nga 194,7 miliardë lekë në nëntor, e ka mbyllur dhjetorin në vlerën 196,9 miliardë. Gjithësesi, e parë në total, kredia për sektorin privat rezulton në ngadalësim gjatë vitit 2023, gjë që i atribuohet më së shumti frenimit të kredisë për likuiditet nga ana e bizneseve.

Rritja e vazhduar e kërkesës së brendshme dhe rritja e fortë e kërkesës së huaj, kryesisht për turizëm, ka përmirësuar likuiditetin e bizneseve, të cilët kanë preferuar të shlyejnë një pjesë të kësaj kredie gjatë muajve të fundit të vitit.

Sipas sektorëve të ekonomisë, është vërejtur tkurrja e kredisë në sektorin e industrisë, përmirësim në sektorin e shërbimeve dhe ngadalësimi në sektorët e tjerë. Financimi i bankave është i orientuar drejt sektorëve që kanë dhënë kontributin më të madh në rritjen ekonomike: tregti, ndërtim dhe turizëm.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.