Kursi i këmbimit, buxheti 2022 me 300 Mln euro plus – Efekti në portofolin e borxhit të shprehur në valutë arriti në 31.7 miliardë lekë

Përtej segmentit të eksportuesve, ekonomia shqiptare ka përfituar nga nënçmimi rekord i euros në raport me lekun, por fituesja më e madhe është padyshim qeveria. Ajo ka një bilanc pozitiv prej 300 milionë eurosh në portofolin e borxhit në hakun kohor të një viti. Sipas shifrave përfundimtare të publikuara nga Ministria e Financave, në fund të muajit dhjetor 2022, borxhi publik u vlerësua në nivelin 1,378 trilionë lekë, ose 64.6% e PBB. Niveli i borxhit ndaj PBB-së u ul me 9.9 p.p. krahasuar me fundin e 2021. Në terma nominalë, niveli i borxhit gjatë vitit 2022 është ulur me 4.3 miliardë lekë krahasuar me fundin e vitit 2021. Është llogaritur një efekt i kursit të këmbimit në portofolin e borxhit të shprehur në valutë prej rreth 31.7 miliardë lekësh, ose rreth 1.5% të PBB-së, ose rreth 300 milionë euro me kursin aktual të këmbimit.

Treguesit përfundimtar të huamarrjes publike zbardhin gjithashtu se ka pasur një kërkesë më të ulët për letrat me vlerë të borxhit të qeverisë në tregun e brendshëm, si rezultat i një niveli pasigurie të lartë në tregje dhe pritshmërive për rritje të normave të interesit, shkaktuar nga zhvillimet e konfliktit Rusi-Ukrainë.

Huamarrja në terma bruto u realizua në vlerën 386.1 miliardë lekë, nga të cilat 92.7% u financuan nëpërmjet burimeve të brendshme dhe 7.3% nëpërmjet burimeve të huaja. Në tregun e brendshëm huamarrja bruto rezultoi në vlerën prej 357.9 miliardë lekë. Financimi neto, krahasuar me vitin e kaluar është më i ulët. Megjithatë, realizimi i një huamarrje më të ulët nga ajo e pritshme për periudhën në fjalë, nuk ka ndikuar në financat publike duke qenë se kjo periudhë nga ana tjetër është karaktrizuar nga zhvillime pozitive në drejtim të të ardhurave buxhetore dhe një niveli likuiditeti të mjaftueshëm gjatë gjithë periudhës.

Lorenc Rabeyta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.