Lajm i mirë për individët, bonot 12-mujore me interes 3.95% – Të martën ankandi i radhës i letrave me vlerë të Qeverisë, rritje e fortë e Yield-eve

Siç qe paralajmëruar nga Televizioni Scan, në Ankandet e bonove të thesarit dhe obligacionet të zhvilluara më 20 shtator, normat e interesit janë ngjitur në nivele që nuk vëreheshin prej vitesh, duke ofruar vlera shumë të kënaqëshme fitimi për ata qytetarë që kërkojnë të fitojnë diccka nga kursimet e tyre. Yieldi  Mesatar i Ponderuar i bonove të thesarit me afat maturimi 12 mujor arriti të martën nivelin 3.95% ,e një rritje të dukshme nga ankandet e korrikut, kur yield-i mesatar i bonove me afat maturimi 12-mujor shënoi 2.84%, duke regjistruar një rritje prej 0.8 pikë përqindje nga muaji prill.

Sipas të dhënave zyrtare të Ministrisë së Financave, shuma fillestare e kërkuar nga Qeveria ishte 7.6 miliardë lekë, apo afërisht 76 milionë dollarë, ndërkohë që shuma e pranuar rezultoi 7 miliardë lekë apo afërisht 70 milionë dollarë.

Ndërkohë që edhe më fitimprurëse qenë normat e fitimit nga obligacionet me afat maturimi 5 vjeccar, edhe ato me rritje të fortë që prej marsit të këtij viti. Në ankandin e së martës ato shënuan një vlerë mesatare të pnderuar prej 6.27%, nga 4.75% në muajin korrik. Vlera e emetuar përmes këtij instruumenti ishte më modeste se ajo e bonove të thesarit, me rreth 7 milionë dollarë.

Me shumë gjasa, normat e interesit të letrave me vlerë të qeverisë priten në rritje edhe për fazën e fundit të vitit. Ministria e Financave ka publikuar Kalendarin e Emetimeve të Titujve Qeveritarë në Tregun e Brendshëm Tremujori katërt 2022. Për të tre muajt janë parashikuar nga shtatë ankande, me një vlerë totale prej 83.5 miliardë lekësh, apo afërsisht 830 milionë dollarësh.

Sipas kalendarit, 31 miliardë do të emetohen në tetor, 29 miliardë në nëntor dhe 23.5 miliardë në dhjetor. Ankandet do të dominohen nga emetimet e bonove të thesarit 12 mujore.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.