Lufta kundër pastrimit të parave – Balluku: Duhet të hartojmë një strategji kombëtare kundër krimit ekonomik

Është mbajtur gjatë ditës së sotme mbledhja vjetore e Komitetit Bashkërendues të luftës kundër pastrimit të parave.

Zëvendëskryeministrja dhe njëherësh ministrja e Infrastrukturës dhe Energjisë, Belinda Balluku tha se falë ndërveprimit dhe bashkëpunimit të të gjithë aktorëve, Shqipëria ka patur një sukses duke dalë nga lista gri e pastrimit të parave.

“Viti 2023 ka qenë pa dyshim një vit i suksesshëm për vendin tonë jo vetëm për sa i takon vlerësimit shumë pozitiv për daljen e Shqipërisë nga lista gri e FATF-së por edhe për përafrimin e legjislacionit shqiptar me atë të BE-së. Më duhet të theksoj se ky moment pozitiv ka ardhur si rezultat e një pune shumë të madhe të të gjithëve ne ku një rol mjaft të rëndësishëm ka pasur edhe konsolidimi dhe zbatimi i reformës në drejtësi, edhe institucionet e reja të krijuara si SPAK duke dhënë impaktin e daljes së Shqipërisë nga lista gri”, tha Balluku

“Vitet e fundit e kam ndjekur nga afër progresin e Shqipërisë në kuadër të raportimeve të ICRG dhe FATF ku për shkak të gamës së gjerë dhe gjithëpërfshirëse të masave të kërkuara dhe të realizuara nga institucionet prezent sot, është vërejtur një angazhim dhe koordinim efikas mes institucioneve tona për një përfaqësim më të mirë në organizmat monitoruese dhe ndërkombëtare. Ne i kemi kushtuar shumë vëmendje rritjes së kapaciteteve institucionale të çdo institucioni si dhe investimeve në sistemet e teknologjisë me synim rritjen e efektivitetit të proceseve të punës në përgjigje të sfidave të reja të teknologjisë mbarë botërorë” shtoi ajo.

“Inteligjenca artificiale dhe ndërveprimi mes institucioneve në luftën kundër krimit ekonomik është një synim dhe objektiv madhor i qeverisë shqiptare. Kemi në fokus të takimit disa çështje kryesore ku çështja e parë është miratimi i vlerësimit kombëtar të riskut dhe planit të veprimit të tij, dokumente kto shumë të rëndësishme jo vetëm për përmbushjen e rekomandimeve ndërkombëtare por edhe për parashikim më të saktë të risqeve me të cilat do të përballemi. Pika e dytë është miratimi i disa fushave ku do të duhet të përqendrohemi gjatë vitit 2024, padyshim si një funksion dhe rrjedhojë e vlerësimit të radhës së Shqipërisë nga Moneyval i cili fillon në 2025 ashtu siç duhet çdo 8 vite, si dhe rekomandime të posaçme teknike që mund të kenë ndryshuar vitet e fundit. Do të jetë edhe ri konceptimi i grupit teknik ndërinstitucional të punës duke e kthyer atë në organizëm dinamik dhe proaktiv me takime të rregullta. Së fundmi synojmë të biem dakord për nevojën e një strategjie kombëtare në fushën e parandalimit dhe goditjes së pastrimit të parave dhe financimit të terrorizmit duke hartuar dhe miratuar këtë strategji brenda 6-mujorit të parë të vitit 2024,” u shpreh Balluku.

N.Xh / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.