Mania për armët gjermane – Cilat vende po blejnë më shumë?

Këtë vit, prodhuesit gjermanë të armëve shënuan eksporte rekord, kryesisht për shkak të dërgesave në Ukrainë.

Në tre tremujorët e parë, qeveria e Berlinit miratoi eksportet e armëve me vlerë 8.76 miliardë euro. Kjo është tashmë më shumë se eksportet në të gjithë vitin e kaluar: 8.36 miliardë euro.

Kështu, sipas të gjitha gjasave, deri në fund të vitit, industria e dedikuar gjermane do të thyejë rekordin e vitit 2021, kur eksportoi armë me vlerë 9.35 miliardë euro.

Më shumë se një e treta e eksporteve janë miratuar nga qeveria për Ukrainën, sipas konfirmimit të ministrisë së Ekonomisë. Armët me vlerë 3.3 miliardë euro shkuan në Ukrainë në tre tremujorët e parë, që është më shumë se katër herë më shumë se i gjithë viti i kaluar.

Në vendet e Bashkimit Europian dhe NATO-s dhe vendeve të tjera partnere – Japonia, Zvicra, Australia dhe Zelanda e Re – industria ushtarake gjermane eksportoi mallra me vlerë 4.33 miliardë euro. Midis tyre, më së shumti për Hungarinë – 1.03 miliardë euro, e cila tani po armatoset fuqishëm.

Armë me vlerë 1.16 miliardë euro u eksportuan nga Gjermania në të ashtuquajturat vende të treta jashtë BE-së dhe NATO-s, duke përjashtuar Ukrainën, deri në fund të shtatorit, më shumë se i gjithë viti i kaluar: 992 milionë euro. Më së shumti armë importoi Koreja e Jugut, me vlerë 251 milionë euro.

Ndër 10 vendet kryesore që importojnë armë gjermane, përveç Ukrainës dhe Koresë së Jugut, nuk ka asnjë vend të tretë.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.