Mbi 47 mijë aplikime kalojnë fazën e parë për financim në bujqësi – Skualifikohen mbi 24 mijë aplikantë, të cilët nuk kanë plotësuar kriteret

Mbi 47 mijë aplikime janë kualifikuar në fazën e parë për të përfituar nga fondet e vëna në dispozicion për sektorin bujqësor përmes Skemës Kombëtare 2023.  Sipas të dhënave zyrtare nga Agjencia e Zhvillimit Bujqësor dhe Rural, interesi më i lartë ka qenë për naftën falas për kryerjen e punimeve të mekanizuara në bujqësi, masë për të cilën janë kualifikuar 33.398 aplikime, ndërsa për masat e tjera janë në total 13.873 aplikantë të përzgjedhur.

Konkretisht, për tufën bazë të matrikulluar të gjedhit janë kualifikuar 3422 aplikime; për tufën bazë të matrikulluar të të imtave janë kualifikuar 5196 aplikime; për mbarështimin e bletarisë kanë kaluar fazën e parë 3899 aplikantë; mbështetje për fara fidanë dhe inpute të tjera janë kualifikuar 908 aplikime;  ndërsa për fermat organike për periudhën në kalim janë kualifikuar 346 aplikime. Sa i takon masës për fermat me certifikimin Global GAP, kanë kaluar fazën e parë 102 aplikantë.

Tashmë këto aplikime do të kalojnë fazën e dytë e cila shoqërohet me dokumentet plotësuese që verifikojnë deklarimin e bërë online në e-albania nga fermerët dhe më pas kualifikohen për përfitimin përfundimtar. Interesi i fermerëve për të përfituar nga subvencionet në bujqësi përmes Skemës Kombëtare 2023 këtë vit është rritur ndjeshëm, ku u regjistruan në total 68.647 aplikime nga fermerët,  apo mbi 10 mijë aplikantë më shumë se një vit më parë.  Fondi total i vënë në dispozicion është 3.2 miliardë lekë dhe do të ndahet në mënyrë propocionale tek të gjithë përfituesit.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.