Në ankande, pasuritë e sekuestruara me ligjin antimafia – Udhëzimi/Shitje përpara konfiskimit përfundimtar, Qeveria përcakton procedurat!

Pasuritë e sekuestruara përmes ligjit antimafia do shiten në ankande pa pritur vendimin përfundimtar të konfiskimit të tyre. Bëhet fjalë për ato pasuri të cilat zhvleftësohen me shpejtësi, apo dalin jashtë përdorimit në kohë të shkurtër. Përmes një Udhëzimi, Këshilli i Ministrave ka miratuar edhe procedurat e ankandeve që do të zhvillohen nga Agjencia e Administrimit të Pasurive të Sekuestruara dhe të Konfiskuara (AAPSK), strukturë në varësi të Ministrisë së Brendëshme.

Do të jetë kjo Agjenci e cila, pasi administron pasurinë e sekuestruar dhe pasi vlerëson se sendi mund të dëmtohet, i bie vlera në mënyrë të ndjeshme ose me kalimin e kohës del jashtë përdorimit, nëpërmjet një vlerësuesi të licencuar dhe një strukture të ngritur për këtë qëllim, përcakton me vendim vlerën e sendit, bazuar në vlerën reale të pasurisë në treg, në çastin e sekuestrimit të tij.

Pas vlerësimit të sendit të sekuestruar, përcakton Udhëzimi i Qeverisë, Agjencia i kërkon pronarit të këtij sendi, të shprehë dakordësinë për çmimin e përcaktuar nga vlerësuesi. Nëse brenda një jave nga njoftimi, Agjencia dhe pronari i sendit nuk arrijnë marrëveshjen, Agjencia vijon me procedurën e ankandit, ndërkohë që brenda 15 ditësh është e detyruar të shpallë publikisht edhe ankandin.

Secili ofertues që merr pjesë në ankand nëpërmjet paraqitjes së ofertës, përpara fillimit të ankandit duhet të depozitojë si garanci, në llogarinë e përcaktuar nga AAPSK-ja, një shumë të hollash të barabartë me 10 për qind të çmimit të sendit të caktuar në shpallje.

Udhëzimi parashikon një ankand të dytë në rast se dështon i pari, ndërkohë që nëse edhe ky ka të njëjtin fat, Agjencia i paraqet gjithë dokumentacionin Komitetit Ndërinstitucional për Masat kundër Krimit të Organizuar, i cili shprehet për vijimin e mëtejshëm të procedurës apo ndryshimin e destinacionit të përdorimit të pasurisë. Udhëzimi përcakton gjithashtu, se të ardhurat e përcaktuara nga shitja, do derdhen në llogarinë e Agjencisë së Administrimit të Pasurive të Sekuestruara dhe të Konfiskuara.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.