Mbyllja e basteve i kushtoi buxhetit 140 milionë euro – Qeveria pritet të zyrtarizojë “plagën sociale”, formalizim i skedinave online!

Në Janar të vitit 2019 qeveria shqiptare vendosi të ulë qepenat e të gjitha kazinove elektonike dhe basteve sportive në vend, duke i cilësuar si një “plagë sociale” për shoqërinë. Vendimi hyri në fuqi më 1 Janar dhe ky aksion preku drejtpërsëdrejti rreth 15 mijë familje që krijonin të ardhura nga ky sektor.

Në total në atë kohë fiunksiononin 3 kompani mëmë të baseve sportive me afro 4200 pika në të gjithë vendin, të cilat u mbyllën fizikisht. Por mbyllja fizike e tyre, ishte fillimi i lulëzimit të një industrie bastesh informale.

Nga 2019 e deri më tani, bastet sportive janë zhvendosur online dhe funksionojnë në mënyrë informale mijëra faqe, ku çdokush përmes një llogarie të hapur permes internetit mund të luajë normalisht. Dhe duke parë këtë ecuri, qeveria mesa duket ka vendosur të zyrtarizojë këtë “plagë sociale” duke formalizuar sërish këtë industri, me qëllim që të vjelë të ardhurat e munguara ndër vite.

Një ditë më parë kryeministri Edi Rama ka zhvilluar një dëgjesë me e drejtues të federative të sportit në vendin tonë të cilët kërkojnë të veprohet sipas rregullave në vendet europiane, për të larguar bastet në të zezë dhe formalizimin e tyre.

Por sa janë të ardhurat e munguara në buxhetin e shtetit nga mbyllja e kësaj industrie gjatë këtyre 4 viteve? Kompanitë e basteve paguanin çdo vit rreth 35 milionë euro në buxhetin e shtetit në formën e taksave dhe tatimeve, ndërsa nga 2019 e tutje i gjithë aktiviteti, i zhvendosur on line, është përkthyer në fitim të pastër pa detyrime për aktorët e këtij tregu.

Madje janë kursyer edhe nga shpenzimet për qiratë e pikave fizike, energjia elektrike, etj. Nëse do të bëjmë një llogari të thjeshtë, buxheti i shtetit ka humbur afro 140 milionë euro të ardhura vetëm nga bastet sportive, ku përfshihet taksa, tatime, sigurime shoqërore dhe shëndetësore, etj. Mesa duket, aksioni i zhurmshëm i para 4 vitesh, “Fundi i marrëzisë”, i ka kushtuar ndjeshëm qeverisë, e cila po merr në konsideratë legalizimin e këtij sektori.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.