Më shumë ndihmë për pandeminë se për krizën energjetike – Si përballuan situatën e pandemisë sipërmarrjet në Itali

Dy vite pandemi si dhe dy vite të tmerrshme për ekonominë. Mbylljet e gjata të bareve, restoranteve, hoteleve, pishinave dhe palestrave. Megjithatë, shteti social në Itali qëndroi në këmbë, duke rritur borxhin publik i cili kaloi 150% në raport me PBB-në.

Por ekonomia nisi të rimëkëmbet, dhe në 2021-shin rritja ekonomike ishte 6.6%. mijëra sipërmarrje të vogla dhe të mesme tejkaluan emergjencën falë fondeve të dhëna nga qeveria për të përballuar një sfidë deri atëherë të paimagjinueshme. Të dhënat e publikuara nga Agjencia e të Ardhurave në vend konfirmojnë se ishin 2.45 milion përfitues të ndihmave të ndryshme në vitin 2020, dhe 2.25 milion në vitin 2021. Ndërkohë që janë më shumë se 9.38 miliard euro të shpërndara në vitin e parë të pandemisë dhe 15.34 miliard euro në të dytin, për një total prej 24.7 miliard euro.

Porthuajse gjysma kësaj shumë është fondi i siguruar nga ekzekutivi italian në dy dekretet e para për krizën aktuale energjitike, i cili është rreth 14 miliard euro. Ndërsa ishin trembëdhjetë masa, në dy vitet në fjalë, gjatë pandemisë, të cilat mandatuan Agjencinë e të Ardhurave të kryente pagesat në llogaritë rrjedhëse të marrësve.

Rajoni që ka përfituar më shumë fonde në vitin 2021 ka qenë Lombardia me mbi 3 miliard euro, Lazio me 1.6 miliard, Veneto 1.4 e kështu me rradhë. Jo rastësisht janë rajonet më të rëndëishme për sa i përket popullsisë dhe pranisë së aktiviteteve ekonomike. Numri i përfituesve në vitin 2020 ishte më i lartë se ai i vitit pasardhës, por sasia e burimeve lëvizi në drejtim të kundërt, me një barrë mbi llogaritë publike prej rreth 6 miliard eurosh në vitin e dytë të Covid. Shenjë se ndërhyrjet janë shtuar, por janë bërë edhe më selektive. Të drejtuara tek ata që i duheshin. Sfida aktuale është ajo e energjisë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.