Merr fund emergjenca e furnizimit me energji – Vendimi i qeverisë është në fuqi deri në 31 dhjetor. Ja çfarë ndryshon

Data 31 dhjetor shënon fundin e gjendjes së emergjencës në furnizimin me energji elektrike, të shpallur nga qeveria në 22 tetor të vitit 2021.

Ndër të tjera, vendimi solli pezullimin e planit të investimeve nga kompanitë publike, përveç investimeve të domosdoshme, teksa u argumentua nga qeveria me krizën globale të energjisë dhe çmimet e rritur në bursa. Kjo do të thotë se me përfundimin e emergjencës kompanitë do iu kthehen investimeve, sipas planeve të miratuar.

Një tjetër ndryshim lidhet me procedurat e shit – blerjes së energjisë elektrike, që me përfundimin e emergencës do t’i rikthehen Operatorit të Shpërndarjes së Energjisë Elektrike. Kjo, pasi sipas një vendimi të dytë të qeverisë, në funksion të përballimit të situatës, e drejta për realizimin e këtyre procedurave iu kalua Korporatës Elektroenergjetike Shqiptare.

Sipas vendimit KESH, duhej të kryente veprime shitjeje energjie dhe depozitimi/shkëmbimi vetëm pasi plotëson të gjitha nevojat e furnizimit të Furnizuesit të Shërbimit Universal”.

Që pas miratimit të vendimit fillestar në vitin 2021, qerveria ka shtyrë disa herë gjendjen e emergjencës, teksa vendimi i fundit e linte në fuqi deri në datën 31 dhjetor të këtij viti. Ndërkohë që, deri më tani nuk është mirataur një vendim i ri për shtyrjen e saj.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.